කොළඹ ලෝක වෙළඳ මධ්‍යස්ථානයේ සුඛෝපභෝගී කාර්යාලයක් පවත්වාගෙන යමින් විශාල මුදලක් සාවද්‍ය පරිහරණය කළැයි රිමාන්ඩ් බන්ධනාගාරගත කර සිටින තිකෝ ගෲප් පුද්ගලික සමාගමේ හිමිකාරිය තිළිණි ප්‍රියමාලි සමඟ හිටපු ජනාධිපති මහින්ද රාජපක්ෂ සහ ඔහුගේ පවුලේ සාමාජිකයන් සම්බන්ධ බවට සමාජ මාධ්‍ය ඔස්සේ පැතිර යන වාර්තා හිටපු ජනාධිපති මහින්ද රාජපක්ෂ මහතාගේ කාර්යාලය ප්‍රතික්ෂේප කරයි. එම කාර්යාලය නිවේදනයක් නිකුත් කරමින් කියා සිටියේ සමාජ මාධ්‍ය ඔස්සේ සංසරණය වන වාර්තා සහ ඡායාරූප අසත්‍ය සහ පදනම් විරහිත බවයි. තිළිණි ප්‍රියමාලි ද සහභාගි වූ උත්සවයකට ශිරන්ති රාජපක්ෂ සහභාගී වන අයුරු දැක්වෙන ඡායාරූපයක් සමාජ ජාලවල සංසරණය වුවත් එය පසුගිය වසරේ මාර්තු මාසයේදී ශිරන්ති රාජපක්ෂ චිත්‍රපටයක් එළිදැක්වීමේ උත්සවයකට සහභාගි වී සිටියදී ලබා ගත් එකක් බව එම නිවේදනයේ සදහන්ය.
තවද මෙම කාන්තාව සමඟ සමීප සම්බන්ධතා පැවැත්වූ ප්‍රසිද්ධ රංගන ශිල්පිනියන් කිහිප දෙනෙකු ගෙන් ප්‍රශ්න කිරීමට නියමිතව තිබේ. අපරාධ පරීක්ෂණ දෙපාර්තමේන්තුව විසින් අදාළ සැකකාරියගෙන් ප්‍රශ්න කිරීමෙන් පසු මෙම නිළියන් සමඟ පැවැති සබඳතා හෙළි වී ඇත. මෙම මූල්‍ය සමාගමට මුදල් ආයෝජනය කළ කෝටිපති පුද්ගලයන් මුදල් ඉල්ලා සිටින අවස්ථාවලදී ඇය ඔවුනට මෙම නිළියන් සම්බන්ධ කර ඇතැයිද හෙලි ව ඇත. එම කෝටිපතියන් සමග අදාළ රංගන ශිල්පිනියන් සිදුකරන සංවාද පටිගත කර ඒවා ව්‍යාපාරිකයන්ට පෙන්වා ඔවුන් බිය පත් කර තිබේ. ඒ සඳහා ආ රංගන ශිල්පිනියකට එක් අවස්ථාවක් සඳහා රුපියල් ලක්ෂ 5 බැගින් මුදල් ගෙවා ඇත. අදාල සංවාද හඬපට මේ වන විට රහස් පොලිසිය භාරයේ පවතී.
Janamina Sri Lanka Rupee Exchange Rate