අයිස් මත්ද්‍රව්‍යට ඇබ්බැහිවීම හේතුවෙන් අංගොඩ මානසික සෞඛ්‍ය විද්‍යායතනයට පාසල් සිසුන් ඇතුළු තරුණයන් ප්‍රතිකාර ලබා ගැනීමට පැමිණීම වැඩිවී ඇතැයි අනාවරණය වෙයි.
මෙම තත්ත්වය මත අයිස් මත්ද්‍රව්‍යට ඇබ්බැහිවූවන්ට නේවාසිකව ප්‍රතිකාර කිරීම සඳහා වෙන් කර ඇති ප්‍රතිකාර ඒකකයද සම්පූර්ණයෙන්ම පිරී ඇති බව අංගොඩ ජාතික මානසික සෞඛ්‍ය විද්‍යායතනයේ මනෝ වෛද්‍ය විශේෂඥ පුෂ්පා රණසිංහ පැවසුවාය.
ගතවූ මාසයක කාලය තුළ අයිස් මත්ද්‍රව්‍යට ඇබ්බැහි වූ මානසික රෝගීන්ගේ ශීඝ්‍ර වැඩිවීමක් පෙන්නුම් කරන බව ඇය සඳහන් කළාය. මේ දිනවල මානසික සෞඛ්‍ය විද්‍යායතනයට පැමිණෙන අවුරුදු දහඅටත් තිහත් අතර වයස් කාණ්ඩයේ පසුවන පිරිමි ළමයින්ගෙන් සියයට හැත්තෑපහක පිරිසක් අයිස් මත්ද්‍රව්‍යට ඇබ්බැහිවීම හේතුවෙන් ඇතිවූ මානසික ව්‍යාකුලතාවයන්ට ප්‍රතිකාර ලබා ගැනීම සඳහා පැමිණෙති.
මනෝ වෛද්‍ය විශේෂඥ පුෂ්පා රණසිංහ ප්‍රකාශ කළේ අයිස් මත්ද්‍රව්‍ය හේතුවෙන් මෙම මානසික රෝගීන්ගේ මොළයට දැඩි බලපෑම් සිදුව ඇති බවය. එසේම අයිස් මත්ද්‍රව්‍යට ඇබ්බැහිවීම හේතුවෙන් කොළඹ ප්‍රදේශයේ මසකට තරුණයන් දස දෙනකු පමණ සිය දිවි හානිකරගැනීමේ ප්‍රවණතාවක් ඇති බව කොළඹ නාගරික අතිරේක හදිසි මරණ පරීක්ෂක ඉරේෂා සමරවීර පැවැසුවාය.
මෙම මත්ද්‍රව්‍යට ඇබ්බැහිවූවන් වසර තුනක් වැනි කෙටි කාලයක් තුළදී සිය දිවි නසා ගැනීමට පෙලඹී ඇති බව ඔවුන්ගේ මරණ පරීක්ෂණවලදී තහවුරු වී ඇත.
- වරුණි පෙරමුණ
Janamina Sri Lanka Rupee Exchange Rate