රජයේ නව බදු ප්‍රතිපත්තියට විරෝධය පා වරාය, තෙල්, විදුලි, බැංකු ඇතුළු ක්ෂේත්‍ර රැසක කාර්ය මණ්ඩල අද (01) ලෙඩ නිවාඩු වාර්තා කර විරෝධතා සහ වෘත්තීය සමිති ක්‍රියාමාර්ගවල නිරත වෙති.
වෘත්තීය සමිති 40ක පමණ නියෝජිතයින් මෙම ක්‍රියාමාර්ග සඳහා එක්වී සිටින බව වාර්තා වේ. ජල, බැංකු, දුම්රිය, විශ්වවිද්‍යාල, ටෙලිකොම් ඇතුළු ක්ෂේත්‍රවල වෘත්තීය සමිති ද මෙම විරෝධතා ක්‍රියාමාර්ග හා එක්ව සිටිති.
වෛද්‍ය, ගුරු, විදුහල්පති සහ තැපැල් සේවකයින් අද වෘත්තීය සමිති ක්‍රියාමාර්ගයට සහාය පළකරමින් විරෝධතාවල නිරත වූවත් වැඩවර්ජනයක නිරත නොවන අතර, ඔවුන් කළු පැහැයෙන් සැරසී රාජකාරියට වාර්තා කිරීම, දිවා ආහාර විවේකයේ දී විරෝධතාවල නිරතවීම ආදී ක්‍රියාමාර්ගවල නිරතවන බව ප්‍රකාශයට පත්කර ඇත.
ඒ අනුව අද බොහෝ ආයතනවල පිරිස් රාජකාරියට පැමිණ තිබුණේ කළු පැහැයෙන් සැරසෙමිනි.
රජයේ වෛද්‍ය නිලධාරින්ගේ සංගමය අද විරෝධතාවක් පමණක් සිදුකරන බව එහි මාධ්‍ය ප්‍රකාශක වෛද්‍ය චමිල් විජේසිංහ පැවසීය.
දුම්රිය වෘත්තීය සමිති ද අද මෙම වෘත්තීය සමිති ක්‍රියාමාර්ගයට සිය සහයෝගය දක්වා ඇත.
වැඩ වර්ජන ක්‍රියාමාර්ගයකට එක්වෙමින් පාර්ලිමේන්තුවේ ලංකා බැංකු ශාඛාවද අද වසා දැමීම හේතුවෙන් එහි වැඩකටයුතුවලට බාධා පැමිණුනු බව වාර්තා වේ. සාමාන්‍යයෙන් පාර්ලිමේන්තු මන්ත්‍රීවරුන් වැඩි පිරිසක් සේවය ලබා ගන්නේ මෙම පාර්ලිමේන්තු බැංකු ශාඛාවෙනි. වැඩ වර්ජන ක්‍රියාමාර්ගයේ නිරත වන හෙයින් බැංකු ශාඛාව වසා දැමෙන බවට දැන්වීම් පත්‍රිකාවක්ද එහි ප්‍රදර්ශනය කර තිබිණැයි පාර්ලිමේන්තු ආරංචි මාර්ග සඳහන් කළේය. ලංකා බැංකු ශාඛාව වසා දැමුණත් ජල සහ විදුලි ඇතුළු පාර්ලිමේන්තුවේ අනෙකුත් සේවා කාර්යාල සාමාන්‍ය පරිදි විවෘතව පැවතිණ.
- ඩයනා උදයංගනී / සුජිත් හේවාජුලි
Janamina Sri Lanka Rupee Exchange Rate