ආසියාවේ දියවැඩියා රෝගීන්ගේ ඉහළම අනුපාතිකය සටහන් කරන රට බවට ශ්‍රී ලංකාව පත්ව ඇති බව සමීක්ෂණයකින් හෙළි වී තිබෙනවා. ඒ අනුව ශ්‍රී ලංකාවේ සෑම වැඩිහිටියන් හතර දෙනෙකුගෙන් එක් අයෙකුට දියවැඩියාව වැලඳී ඇත.
එය ප්‍රතිශතයක් ලෙස 23%ක් වන අතර එම සමීක්ෂණය කොළඹ වෛද්‍ය පර්යේෂණ ආයතනය, සෞඛ්‍ය ප්‍රතිපත්ති පිළිබඳ ආයතනය සහ කොළඹ, රුහුණ, රජරට විශ්වවිද්‍යාල විසින් සිදුකර ඇත්තේ. මේ අතර කොළඹ දිස්ත්‍රික්කයේ වැඩිහිටියන් තුන් දෙනෙකුගෙන් එක් අයකුට දියවැඩියාව වැලඳී ඇති අතර එය 31%ක ප්‍රතිශතයකී.
නිවේදනයක් නිකුත් කරමින් ඒ සම්බන්ධයෙන් ලංකා හොස්පිට්ල් රසායනාගාර ප්‍රධානී, වෛද්‍ය ගීතානි ගලගොඩ මහත්මිය සඳහන් කළේ මෙසේ ය,
“දියවැඩියාව යනු නිහඬ මරුවකු බව අපේ සමාජය දන්නේ නැත. ඒ නිසාම මේ රෝගය නොසලකා හැරීමට බොහෝ අය පුරුදුව සිටියි.දියවැඩියාව යනු කුමක්දැයි පළමුව සොයා බලමු. සෑම පුද්ගලයකුගේම රුධිරයේ යම් සීනි ප්‍රමාණයක් ඇත.මෙය අසාමාන්‍ය ලෙස ඉහළ යෑම දියවැඩියාව ලෙස හැඳින්වේ. රුධිරයේ සීනි මට්ටම ඉහළ යෑමට බලපාන හේතු රැසක් තිබේ. එයින් සුලබම හේතු ලෙස ජානමය බලපෑම්, ස්ථූලභාවය, ආතතිය, පිෂ්ඨජනක ආහාර (Carbohydrates) වැඩිපුර පරිභෝජනය, නිසි ශාරීරික ව්‍යායාම්වලට යොමු නොවීම හැඳින්විය හැකිය.
නිරෝගී පුද්ගලයකුගේ රුධිරයේ සාමාන්‍ය සීනි මට්ටම 100 mg/dlට අඩු වේ. රුධිරයේ සීනි මට්ටම 100-125 mg/dl අතර පැවතීම පූර්ව දියවැඩියා රෝගී තත්ත්වය ලෙස හැඳින්විය හැකිය. රුධිරයේ සීනි මට්ටම 126 mg/dlට වඩා පැවතීම දියවැඩියා රෝගී තත්ත්වය ලෙස හඳුනාගත හැකිය. රුධිරයට සීනි ලැබෙන්නේ අප ආහාරයට ගන්නා පිෂ්ඨජනක ආහාර ජීර්ණය වීමෙනි.ලේවල සීනි ප්‍රමාණය ඉහළ යෑමෙන් දිවා, රාත්‍රී දෙකේම මුත්‍රා පිටවීම වැඩි වන අතර, දැඩි පිපාසයක් ද ඇති වේ. තෙහෙට්‍ටුව, නිතර කුසගිනි දැනීම, නිදිමත, අප්‍රාණික බව මෙන්ම ශරීරය කෙට්‍ටු වීම මේ නිසා ඇති වේ.
දියවැඩියාව ඇති රෝගියකුට වකුගුඩු ආබාධ, හෘද රෝග, ආඝාතය, අන්ධභාවය වැනි රෝග ද වැලඳීමේ වැඩි ඉඩකඩක් ඇත.කොළඹ වෛද්‍ය පර්යේෂණ ආයතනය, සෞඛ්‍ය ප්‍රතිපත්ති පිළිබඳ ආයතනය සහ කොළඹ, රුහුණ, රජරට විශ්වවිද්‍යාල කළ සමීක්ෂණවලට අනුව ශ්‍රී ලංකාවේ සෑම වැඩිහිටියන් හතර දෙනකුගෙන් එක් අයකුට දියවැඩියාව වැලඳී ඇත.එය 23%ක ප්‍රතිශතයකි. කොළඹ දිස්ත්‍රික්කයේ වැඩිහිටියන් තුන් දෙනෙකුගෙන් එක් අයකුට දියවැඩියාව වැලඳී ඇත. එය 31%ක ප්‍රතිශතයකි. 2019දී කොළඹ, රුහුණ, රජරට විශ්වවිද්‍යාල කළ සමීක්ෂණයකට අනුව සෑම පුද්ගලයන් තුන් දෙනෙකුගෙන් එක් අයකු දියවැඩියාවට ප්‍රතිකාර ගෙන ඇත.
එසේම මුළු ආසියාවේම දියවැඩියා රෝගීන්ගේ ඉහළම අනුපාතිකය සටහන් කරන රට ශ්‍රී ලංකාවයි.ඉදිරි දශක කිහිපය ඇතුළත මිලියන ගණනින් ශ්‍රී ලංකිකයන් දියවැඩියාවට ගොදුරු වීම වැළැක්විය නොහැකි අතර, එයට අපේ සෞඛ්‍ය පද්ධතියට ඉදිරි වසර කීපය තිස්සේම මුහුණ දීමට සිදු වන බව සෞඛ්‍ය ප්‍රතිපත්ති පිළිබඳ ආයතනය අනතුරු අඟවා ඇත. අමෙරිකානු රෝග විශේෂඥයන්ගේ විද්‍යාලයෙන් (CAP)අනුමත එකම ශ්‍රී ලාංකික වෛද්‍ය රසායනාගාරය වන ලංකා හොස්පිට්ල් රසායනාගාරයේ දෛනිකව සිදුකෙරෙන රුධිර සීනි පරීක්ෂණයන් මගින් ද දියවැඩියා රෝගීන් වැඩිවීමේ ප්‍රවණතාවයක් පෙන්නුම් කරයි. දියවැඩියා රෝගය පිළිබඳ ජනතාව දැනුවත් කිරීමට නොයෙක් වැඩසටහන් ක්‍රියාත්මකය.
සෞඛ්‍ය සම්පන්නව ජීවත් වන ආකාරය මේ අතර මූලිකය. ඒ පිළිබඳ ක්ෂේත්‍රයේ ප්‍රවීණයන් පවසන දේ වැදගත්ය. දියවැඩියා මූලික පරීක්ෂණවලට යොමුවෙලා සෞඛ්‍ය සම්පන්න ජීවිතයක් ගෙවන්න තමන් ඇතුළු තමන්ගේ සමීප ඥාතීන්, මිතුරන් උනන්දු කරවන්න කියලා හැමෝගෙන්ම මම කාරුණිකව ඉල්ලා සිටිනවා.දියවැඩියාව වගේම දිගු කාලයක් පුද්ගලයකුට දියවැඩියාව ඇති කරන්න පුළුවන් බරපතළ සෞඛ්‍ය ප්‍රතිවිපාක මඟහරවා ගන්න අවශ්‍ය ජීවන රටා වෙනසකට මාරුවෙන්න කියලත් මම මතක් කරනවා.”
Janamina Sri Lanka Rupee Exchange Rate