මීගොඩ පොලිස් වසමේ ගොඩගම ලයනල් ජයසිංහ මාවතේ ව්‍යාපාරිකයෙකු ගේ නිවසකින් සොරකම් කරන ලද රු රුපියල් කෝටි 35 ක් පමණ වටිනා බව කියන මැණිකක් සහ රුපියල් ලක්ෂ 27 ක් පමණ වටිනා අත් ඔරලෝසුවක් සමගින් “චාටර් චූටි” නැමැති සැකකරුවෙක් හෙරොයින් පාර්සලයක් සමගින් අද (04) දින අත්අඩංගුවට ගත් බව මීගොඩ පොලිසිය පවසයි.
ඉකුත් වෙසක් පොහෝ දින සැකකරු විසින් මෙම සොරකම සිදුකර තිබුනු අතර අදාල මැණික විකිණීමට භාර ගත් ව්‍යාපාරිකයෙකු සහ මැණික් ගලෙහි හැඩය වෙනස් කිරීමට භාර ගත් තවත් සැකකරුවන් දෙදෙනෙකු ද සැකපිට අත්අඩංගුවට ගත් බව ද පොලිසිය පවසයි
අත්අඩංගුවට ගත් ප්‍රධාන සැකකරු මීගොඩ හෙට්ටියාවත්ත ප්‍රදේශයේ පදිංචිකරුවකු වන අතර අත්අඩංගුවට ගත් අවස්ථාවේදී සැකකරු සංතකයේ තිබී හෙරොයින් ග්‍රෑම් 20 මිලි ග්‍රෑම් 300 ක් ද සොයා ගත් බව ත් සැකකරු දැඩි ලෙස හෙරොයින් පානයට හුරු වූ අයෙකු බවත් නිවාසවලට පැන සොරකම් කිරීම පුරුද්දක් ලෙස සිදු කර ඇති බවත් අනාවරණය වූ බවද පොලිසිය පවසයි
අත්අඩංගුවට ගත් අනෙක් සැකකරුවන් අතර අදාල මැණික විකිණීමට බාර ගත් බොරලැස්ගමුව ප්‍රදේශයේ පදිංචි 47 හැවිරිදි ව්‍යාපාරිකයෙකු සහ මැණික් ගලේ හැඩය වෙනස් කිරීමට භාර ගත් ඇහැලියගොඩ ප්‍රදේශයේ පදිංචිකරුවකු වන 68 හැවිරිදි පුද්ගලයකු වන බවද පොලිසිය පවසයි
ඉකුත් වෙසක් පොහොය දින ප්‍රධාන සැකකරු විසින් අදාල ව්‍යාපාරිකයාගේ නිවසට සොරෙන් ඇතුලු වී රුපියල් ලක්ෂ හතලිහක් පමණ වටිනා බව කියන රත්‍රං භාණ්ඩ සහ මෙම මැණික සොරකම් කර තිබුණි.
- කේ බුද්ධික කුමාරසිරි
Janamina Sri Lanka Rupee Exchange Rate