චීන බලධාරීන් ටිබෙටයේ ආරාම වැටලීම් සහ සෝදිසි කිරීම් කිහිපයක් සිදුකර ඇති අතර, ටිබෙට් බුදුදහමේ උත්තරීතර ආධ්යාත්මික නායකයා වන දලයි ලාමා සමඟ ඇති සියලු සබඳතා බිඳදැමීමට අවශ්ය ලියකියවිලිවලට අත්සන් කරන ලෙස භික්ෂූන් වහන්සේලාට බල කර ඇතැයි රේඩියෝ ෆ්රී ඒෂියා වාර්තා කරයි.
මෙම මාසයේ සිට, ආරක්ෂාව පවත්වාගෙන යාමේ මුවාවෙන් චීන බලධාරීන් ෂෙන්ට්සා සහ සොක් ප්රාන්තවල ආරාම සෝදිසි කිරීම් ආරම්භ කර ඇති බව එම වාර්තාව සඳහන් කරයි.
එහිදී උපුටා දක්වා ඇති මූලාශ්රයට අනුව, ටිබෙටයේ ප්රකට ශාස්ත්රා ආරාමයේ භික්ෂූන් වහන්සේලාටද ශුද්ධෝත්තම දලයි ලාමා සමඟ සබඳතා අත්හැරීමටත්, දලයි ලාමා විරෝධී කණ්ඩායම්වලට එක්වීමටත් බලකෙරී ඇත.
පසුගිය වසරේ රේඩියෝ ෆ්රී ඒෂියා වාර්තා කළේ, රජයේ නිල තනතුරුවල සේවය කරන ටිබෙට් ජාතිකයින්ට රැකියා කොන්දේසියක් ලෙස දලයි ලාමා සමඟ ඇති සියලු සබඳතා කපාහැරීම චීනය අනිවාර්ය කර ඇති බවයි.