මුලතිව් , කොක්කුතුඩුවායි ප්‍රදේශයේ අස්ථි කොටස් හමුවීම සම්බන්ධයෙන් ජාත්‍යන්තර පරීක්ෂණයකට ඉඩලබා දෙන ලෙස ඉල්ලා උතුරු පළාතේ වෙළෙඳ ව්‍යාපාරිකයෝ සිය ව්‍යාපාරික ස්ථාන වසාදමා අද හර්තාලයක නිරත වූහ.
හර්තාලයට සහය පලකරමින් උතුරු පළාතේ ධාවනය වන පෞද්ගලික බස්රථ , ත්‍රීරෝධ රථ සහ වෙනත් පොදු ප්‍රවාහන සේවා ධාවනයෙන් ඉවත්ව සිටීම හේතුවෙන් පාසල් අධ්‍යන කටයුතු සහ පාසල් වෙත ළමුන්ගේ පැමිණීම අඩුවක් පැවති අතර ගමනා ගමන පහසුකම් නොමැතිවීමෙන් රාජ්‍ය ආයතනවලටද දැඩි බලපෑමක් එල්ලවිය.
යාපනය , මුලතිව් , කිලිනොච්චිය , මන්නාරම හා වවුනියාව දිස්ත්‍රික්කයන් හි සියළු ව්‍යාපාරික ස්ථාන වසා දමා හර්තාලයට සහය පලකොට තිබූ අතර අත්‍යවශ්‍ය සේවා පමණක් ක්‍රියාත්මක විය.
කොක්කුතුඩුවායි ප්‍රදේශයේ ජනතාවට පානීය ජලය ලබාදීම සඳහා ජලසම්පාදන මණ්ඩලයේ සේවකයන් පිරිසක් පසුගිය ජුනි 29 වැනිදා බැකෝ යන්ත්‍රයකින් කාණු කපා ජල නළ එළීමේදී පොළව යට තිබී මිනිස් අස්ථි කොටස් හා හමුදා නිලඇඳුමකට සමාන ඇඳුම් කොටස් කිහිපයක් හමුවිය.
කෝකිලායි පොලිසිය මුලතිව් මහෙස්ත්‍රාත් අධිකරණ නියෝගයටතේ අදාළ ස්ථානයේ කැණීම් සිදුකළ අතර එහිදී මිනිස් අස්ථිකොටස් කිහිපයක් හා හමුදා නිලඇඳුමකට සමාන ඇඳුම් කොටස් කිහිපයක් සොයාගෙන තිබූ අතර එය යුද සමයේ මියගිය එල්.ටි.ටි.ඊ කාන්තා සෙබලියකගේ සිරුරක කොටස් බවට විමර්ශන නිලධාරීන් හදුනාගෙන තිබිණ.
- සිතුම් චතුරංග සහ රොමේෂ් මධුෂංක
Janamina Sri Lanka Rupee Exchange Rate