කූඨ ලේඛන භාවිතා කරමින් ඉතාලිය වෙත පැන යාමට තැත් කළ ශ්‍රී ලාංකික තරුණ යුවළක් කටුනායක ගුවන් තොටුපොළ පිටත්වීමේ පර්යන්තයේ දී අත් අඩංගුවට ගෙන තිබේ.
මෙලෙස අත්අඩංගුවට ගෙන ඇත්‌තේ යාපනය , චන්කනායි ප්‍රදේශයේ පදිංචි 27 හැවිරිදි තරුණයෙක් සහ 28 හැවිරිදි තරුණියකි.
මෙම යුවළ ඊයේ සවස 05ට අබුඩාබි බලා පිටත්ව යන එටිහාඩ් ගුවන් සේවයේ EY- 279 දරන ගුවන් යානයට කටුනායක ගුවන් තොටුපොළ වෙත පැමිණ තිබුණි.
මොවුන් පිළිබඳ ඇති වූ සැකය මත ආගමන විගමන දේශසීමා ආවේක්ෂණ ඒකකය වෙත කැඳවා, ඔවුන් රැගෙන විත් තිබූ ගමන් මලු පරීක්ෂා කිරීමේදී ඒවා තුළ ව්‍යාජ තොරතුරු ඇතුළත් කර සකස් කළ ගුවන් ගමන් බලපත්‍ර දෙකක් සහ මෙම තරුණයාට අයත් ව්‍යාජ වීසා බලපත්‍රයක් ද සොයා ගෙන තිබේ.
එහිදී ආගමන විගමන කාන්තා නිලධාරිනියක් කැඳවා තරුණියගේ සිරුර පරීක්ෂා කර ඇති අතර එහිදී ඇයගේ යට ඇඳුම තුළ සඟවා ගෙන තිබූ ව්‍යාජ ඉතාලි වීසා බලපත්‍රය සොයා ගෙන තිබේ.
අත් අඩංගුවට ගත් මෙම යුවළ වැඩිදුර විමර්ශන කටයුතු සදහා කටුනායක ගුවන් තොටුපොළ අපරාධ විමර්ශන දෙපාර්තමේන්තු නිලධාරීන් වෙත භාර දී තිබේ.
Janamina Sri Lanka Rupee Exchange Rate