මෙවර යල කන්නයට බලපෑ වියළි කාලගුණය හේතුවෙන් මේ වන විට වැඩි ම වගා හානි ප්‍රමාණයක් වාර්තා වී ඇත්තේ කුරුණෑගල දිස්ත්‍රික්කයෙන් බව කෘෂිකාර්මික හා ගොවිජන රක්ෂණ මණ්ඩලයේ සභාපති ඩබ්.එම්.එම්. බී. වීරසේකර කෘෂිකර්ම ඇමති මහින්ද අමරවීරට දැනුම් දී ඇත.
වියළි කාලගුණය හේතුවෙන් දිස්ත්‍රික්ක කිහිපයක වගා හානි සිදු වී ඇතත් දැනට සිදු කර ඇති තක්සේරු කිරීම් අනුව වැඩි ම වගා හානි සිදුවීම් වාර්තා වන්නේ කුරුණෑගල දිස්ත්‍රික්කයෙන් බව සභාපතිවරයා එහිදී සඳහන් කොට තිබේ.
මේ අතර, වියළි කාලගුණයෙන් සිදු වූ වගා හානි සම්බන්ධව සවිස්තරාත්මක වාර්තාවක් ඉදිරි සතිය තුළ තමාට ලබා දෙන්නැයි කෘෂිකර්ම ඇමති මහින්ද අමරවීර ඊයේ (අගෝ. 10) කෘෂිකාර්මික හා ගොවිජන රක්ෂණ මණ්ඩලයට උපදෙස් ලබා දී ඇත.
මෙතෙක් කෘෂිකාර්මික හා ගොවිජන රක්ෂණ මණ්ඩලය විසින් වගා හානි සඳහා ගෙවා ඇති වැඩි ම මුදල් ප්‍රමාණය මෙවර යල කන්නය සඳහා ගෙවීමට රජයට සිදුවනු ඇති බව කෘෂිකර්ම ඇමති මහින්ද අමරවීර ගොවිජන රක්ෂණ මණ්ඩලයේ සභාපතිවරයා හමුවේ පවසා තිබේ.
එම මුදල් ප්‍රමාණය කෙතෙක් ද යන්න සිතා ගැනීමටවත් නොහැකි වනු ඇතැයි එහිදී ඇමතිවරයා අවධාරණය කොට ඇත.
මෙවර යල කන්නයේදී සිදුවී ඇති වගා හානි වීම් තක්සේරු කිරීමේ කටයුතු වහාම අරඹන්නැයි කෘෂිකර්ම ඇමති මහින්ද අමරවීර කෘෂිකාර්මික හා ගොවිජන රක්ෂණ මණ්ඩලයට ලබා දුන් උපදෙස් අනුව මේ වනවිට එම මණ්ඩලය සෑම දිස්ත්‍රික්කයක් ම ආවරණය වන පරිදි හානි තක්සේරු කිරීම් ආරම්භ කර ඇතැයි කෘෂිකර්ම අමාත්‍යාංශය සඳහන් කළේ ය. මේ සම්බන්ධයෙන් කෘෂිකර්ම අමාත්‍යාංශයේ ලේකම් ගුණදාස සමරසිංහගෙන් ‘මව්බිම’ කළ විමසීමේදී ඔහු පැවසුවේ ගොවිජන රක්ෂණයේ නිලධාරීන් මේ වන විට කුරුණෑගල දිස්ත්‍රික්කයේ නිරීක්ෂණය කරමින් හානි වූ ගොවිබිම් පිළිබඳ තක්සේරු කටයුතු සිදුකරමින් සිටින බව ය.
කෙතරම් වගා බිම් ප්‍රමාණයක් වියළි කාලගුණයෙන් විනාශ වී ඇද්ද යන්න නිශ්චිතව ම ප්‍රකාශ කළ නොහැකි බව ද ඔහු කීය. හම්බන්තොට, මොනරාගල හා කුරුණෑගල යන දිස්ත්‍රික්කවලින් මේ වන විට වගා හානි වීම් වැඩි වශයෙන් වාර්තා වී ඇති බව ත් ඒ පිළිබඳ පූර්ණ සංඛ්‍යාලේඛන ඉදිරිපත් කළ හැක්කේ ගොවිජන රක්ෂණ නිලධාරීන් සිදුකරන තක්සේරු කටයුතු අවසන් වූ පසුව බව ද ලේකම්වරයා අවධාරණය කළේ ය.
එමෙන් ම මේ වන විට හම්බන්තොට දිස්ත්‍රික්කයේ හෙක්ටයාර් තුන්දහසක් පමණ හානි වී ඇතැයි හඳුනාගෙන ඇතැයි ඔහු කීය. සුළු වාරිමාර්ග ආශ්‍රයෙන් වගා කළ ගොවි බිම් හෙක්ටයාර 196.2ක් පමණ හානියට පත්ව ඇතැයි ද මහවැලි කලාපයේ ගොවිබිම් 3,850ක් පමණ පූර්ණ ලෙස හානි වී ඇතැයි ද ලේකම්වරයා සඳහන් කළේ ය.
පසුගිය වකවානුවේදී වගා හානි නොවූ ගොවීන් ද වගා හානි වූ බව පවසමින් වගා වන්දි ලබාගෙන ඇතැයි අනාවරණය වී ඇති නිසා ගොවිජන රක්ෂණ නිලධාරීන් ක්‍ෂේත්‍රයේ සිදුකරන පරීක්ෂා කිරීම්වලින් අනතුරුව පමණක් වගා වන්දි ලබා දෙන බව ද ඔහු පැවසීය.
- savani
Janamina Sri Lanka Rupee Exchange Rate