තම සැමියාගේ පුරුෂ ලිංගය ගිරයකින් කපා බරපතළ තුවාල සිදු කිරීමේ සිද්ධියක් සම්බන්ධයෙන් සැකපිට අත්අඩංගුවට ගෙන රිමාන්ඩ් භාරයේ සිටි කාන්තාවක රුපියල් ලක්ෂ දෙකක් වටිනා ශරීර ඇප දෙකක් මත මුදා හැරීමට අනුරාධපුර ප්‍රධාන මහේස්ත්‍රාත් සහ අතිරේක දිසා විනිසුරු නාලක සංජීව ජයසූරිය නියෝග කර තිබේ.
සැකකාර කාන්තාව අනුරාධපුර ශික්ෂණ රෝහලේ මානසික වෛද්‍ය සායනයකට යොමු කර මානසික රෝග විශේෂඥ වෛද්‍යවරයෙකු හමුවට ඉදිරිපත් කිරීමෙන් පසු ඊට අදාළ වෛද්‍ය වාර්තාව නොවැම්බර් 17 දින අධිකරණයට ඉදිරිපත් කරන ලෙස ප්‍රධාන මහේස්ත්‍රාත්වරයා කවරක්කුලම පොලිසියට නියෝග කර ඇත.
තොප්පිගල ප්‍රදේශයේ යුද හමුදා කඳවුරක සේවය කරන මෙම පුද්ගලයා දිවා කාලයේ නිවසේ නිදාගෙන සිටින අතරවාරයේ සැකකාරිය ගිරයකින් ඔහුගේ පුරුෂ ලිංගය අඟල් දෙකක් පමණ කපා බරපතළ තුවාල සිදු කර ඇති බව ත් තුවාලකරු අනුරාධපුර ශික්ෂණ රෝහලට ඇතුළත් කිරීමෙන් පසු වැඩිදුර ප්‍රතිකාර සඳහා පොළොන්නරුව මහ රෝහලට ඇතුළත් කළ බව ත් මෙම සිද්ධිය සම්බන්ධයෙන් අධිකරණයට කරුණු දක්වමින් කවරක්කුලම පොලිසිය සඳහන් කළේ ය.
අගතියට පත් පැමිණිලිකාර යුද හමුදා සෙබළා වෙනුවෙන් අධිකරණයට කරුණු දක්වමින් නීතිඥ දිමුතු බණ්ඩාර සඳහන් කළේ, මෙරට පැවති තිස් වසරක යුද්ධයේ දරුණු සටන් අවස්ථාවලදී පවා මුහුණ දුන් යුද හමුදා සෙබළෙකු වන සිය සේවාදායකයා යුද සටන් පැවති යුද බිමේදී පවා මෙවැනි විපතකට මෙන් ම වේදනාවකට පත් නොවූ බව ය.
සැකකාර කාන්තාව වෙනුවෙන් අධිකරණයට කරුණු දක්වමින් නීතිඥ සංජය රත්නායක ප්‍රශ්න කර සිටියේ, පැමිණිලිකරු යුද හමුදා සෙබළෙකු නම් සිය බිරිඳ ඔහුගේ පුරුෂ ලිංගය ගිරයකින් කපන තුරු ඔහු බලා සිටියේ මන් ද? යන්න ය. දරුණු යුද අවස්ථාවන්වලට මුහුණ දී සිය ජීවිතය සහ අත පය ආරක්ෂා කර ගත් හමුදා සෙබළෙකුට තම බිරිඳගෙන් සිය පුරුෂ ලිංගය ආරක්ෂා කර ගැනීමට නොහැකි වූයේ මන්දැයි? යනුවෙන් ද ඔහු විමසීය.
- Ananda Karunadasa – Anuradhapura
Janamina Sri Lanka Rupee Exchange Rate