රැඳවියන් අතර ගැටුමක් ඇතිවූ කන්දකාඩු පුනරුත්ථාපන මධ්‍යස්ථානයේ කළමනාකාරීත්වය ඉදිරියේදී වෙනස් කිරීමට බලාපොරොත්තු වන බව අධිකරණ බන්ධනාගාර කටයුතු සහ ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය ආචාර්ය විජයදාස රාජපක්ෂ ලංකාදීපයට පැවසීය.
එම ගැටුම සම්බන්ධයෙන් තමා වාර්තාවක් ඉල්ලා ඇතැයිද ඔහු සඳහන් කළේය.
කන්දකාඩු පුනරුත්ථාපන මධ්‍යස්ථානය සම්බන්ධයෙන් ඉදිරියේදී අලුත් වැඩපිළිවෙළක් ක්‍රියාත්මක කිරීමට බලාපොරොත්තු වන බව පැවසූ අමාත්‍යවරයා මධ්‍යස්ථානයට දෙවැනි වතාවට පැමිණෙන රැඳවියන් වෙනත් ස්ථානයකට යැවීමට පියවර ගන්නා බවද සඳහන් කළේය.
එහි බොහෝ ගැටුම්වලට මුල පුරා ඇත්තේ දෙවෙනි වතාවට පැමිණෙන රැඳවියන් බවට විමර්ශනවලදී තොරතුරු අනාවරණයවී ඇතැයි විජයදාස රාජපක්ෂ පැවසීය.
කන්දකාඩු පුනරුත්ථාපන මධ්‍යස්ථානයේ රඳවියන් දෙපිරිසක් අතර ඇතිවූ ගැටුමකින් රැඳවියෝ විසිපස් දෙනෙක් තුවාල ලබා රෝහල් ගත කරනු ලැබ සිටිති.
එම ගැටුම අතරේදී රැඳවියන් පනස් දෙනකු පලා ගිය නමුත් ඉන් විසි පස් දෙනෙක් පොලිසිය විසින් පසුව අත්අඩංගුවට ගනු ලැබූහ.
- සුජිත් හේවාජුලිගේ
Janamina Sri Lanka Rupee Exchange Rate