දහයියා නොදන්නා නෝනා . . .

එය මෙරට ප්‍රධානතම අමාත්‍යාංශයකි. මෙවර මහ කන්නයේ වී මිලදී ගැනීමේ විෂය භාරව ඇත්තේද මේ අමාත්‍යාංශයටය. කෙසේ නමුත් මේ අමාත්‍යාංශයේ නිලධාරීන් බහුතරයක් සාමාන්‍ය ජනතාව ජීවත් වන ආකාරය ගැන නම් නොදන්නේය. කොටින්ම කියතොත් කුඹුර ගැනවත් නොදන්නේය.

රජය මෙවර වී මිලදී ගැනීම සිදු කරන්නේ සුළු හා මධ්‍ය පරිමාණ වී මෝල් හිමියන් හරහාය. ඒ පිළිබඳව විශේෂ සාකච්ඡාවක් ජනාධිපති කාර්යාලයේදී පසුගිය දිනකදී පැවැත්විණි. රජයේ ආයතන කීපයක නිලධාරීහු මේ සාකච්ඡාවට පැමිණ සිටියහ.

වී මිලදී ගැනීමේ විෂය භාරව ඇත්තේ අමාත්‍යාංශයේ ඉහළ නිලධාරිනියකටය. වී මිලදී ගැනීම ගැන පිරිස කතා කරගෙන යද්දී කුමන හෝ කාරණයකට ‘දහයියා’ පිළිබඳවද සාකච්ඡා කෙරිනි. එහිදී ඉහළ නිලධාරිනිය එකවරම “මේ… මොනවටද දහයියා කියන්නේ’’ යැයි විමසුවාය. සාකච්ඡාවට පැමිණ සිටි සියලු දෙනාම මුහුණින් මුහුණ බලාගත්තත් සිනහව පිට නොකර සිටියේ මහත් අපහසුවෙනි.

“මැඩම්… කුඹුරෙන් කපලා ගන්න වී ටික මෝලට ගෙනිහින් අඹරනවානේ. වී ඇටෙන් ඉවත් වෙන පොත්තට තමයි දහයියා කියන්නේ..’’ යැයි පැමිණ සිටි අය ඇයට සරලව පහදා දුන්නේය.

සාකච්ඡාවෙන් පසු පැමිණි සිටි පිරිස කතා වුණේ වී මිලදී ගැනීමේ විෂය භාරදී ඇත්තේ දහයියා ගැනවත් නොදන්නා අයකුට බවය. පුදුමයි මෝල කියන්නේ මොකක්ද කියලා අහපු නැති එක යැයි එක් නිලධාරියකු පිරිස සමග කීවේය.

• සාලිය කුමාර ගුණසේකර