ශ්‍රී ලංකා ගමනා ගමන මණ්ඩලයේ ආදායම් අඩුවීමට ප්‍රධානම හේතුව කොන්දොස්තරවරුන් සොරකම් කිරීම යැයි ලංකා ගමනා මණ්ඩලයේ සභාපති ලලිත් ද අල්විස් පැවසීය.
කොන්දොස්තරවරුන් මගීන්ගෙන් මුදල් අයකර ගෙන ප්‍රවේශපත්‍ර නිකුත් නොකිරීම වැඩි වශයෙන් සිදුවන බවත්, ඒ බව කරන ලද විමර්ශනවලදී තහවුරු වී ඇති බවත් සභාපතිවරයා කීවේය.
මණ්ඩලය විසින් ජංගම පරීක්ෂකවරුන් යොදවා වැටලීම් කරන දිනවලදී ලංගම ආදායම රුපියල් ලක්ෂ ගණනින් වැඩි වන බවත්, අනෙක් දිනවලදී ආදායම ලක්ෂ ගණනින් පහත වැටෙන බවත් කී සභාපතිවරයා ලංගම ආදායම් අහිමි වීමට ප්‍රධානම හේතුව කොන්දොස්තරවරුන්ගේ ක්‍රියාකලාපය බවට එමගින්ම තහවුරු වී ඇති බවත් සඳහන් කළේය.
මේ අනුව සියලුම පළාත් ප්‍රාදේශීක කළමනාකරුවන්ටත්, ඩිපෝ අධිකාරීවරුන් හා ඩිපෝ කළමනාකරුවන්ටත් ජංගම පරීක්ෂා කිරීම් වැඩි වශයෙන් සිදුකර ලංගම ආදායම් ඉහළ දැමීමටත් වංචා කරන කොන්දොස්තරවරුන් හසුකර ගැනීමටත් කඩිනම් ක්‍රියාමාර්ග ගන්නා ලෙසට උපදෙස් දී තිබෙන බවද සභාපතිවරයා කීවේය.
මේ අතර ප්‍රවේශපත්‍ර නොමැතිව ලංගම බස්රථවල ගමන් කරන පුද්ගලයන් සඳහා දැනට ක්‍රියාත්මක රුපියල් දෙසීය පනහක දඩය රුපියල් තුන්දහසක් දක්වා වැඩි කරන බවත්, ඒ අනුව ඉදිරියේදී හසුවන පුද්ගලයන්ට රුපියල් තුන්දහසක දඩ මුදලක් හා ගමන් ගාස්තුව මෙන් දෙගුණයක මුදලක් ගෙවීමට සිදුවනු ඇති බවත් හෙතෙම කියා සිටියේය.
ශ්‍රී ලංකා ගමනා ගමන මණ්ඩලය ඩිපෝ 107ක් මගින් බස් රථ හාරදහස් හත්සියයක සංඛ්‍යාවක් දිවයින පුරා ධාවනය වේ.
- එෆ්. අස්ලම්
Janamina Sri Lanka Rupee Exchange Rate