‘ඕෆ් රෝඩ්’ මෝටර් රථ ධාවන තරගාවලිය . . .

අවිස්සාවේල්ල තල්දූව ‘හෝස් හිල්’ ධාවන පථයේදී පවත්වන ලද ‘තල්දූව හිල් ක්ලයිම්බ් 4×4’ ධාවන තරගාවලියේ ප්‍රධානතම ඉසව්ව වූ එක්ස්ට්‍රීම් කාණ්ඩයේ ජයග්‍රහණය හිමිකර ගැනීමට දමිත් නිසංක සහ රවිඳු ධනංජය පසුගියදා සමත් වූහ.

ශ්‍රී ලංකාවේ ‘ඕෆ් රෝඩ්’ මෝටර් රථ ධාවන ක්‍රීඩාවේ ප්‍රමුඛතම සමාජයක් වන ‘ද ස්කෝපියන්’ සමාජය මගින් සංවිධානය කළ මෙම තරගාවලිය මෑතකදී ඉදිකිරීම් නිමා කරන ලද තල්දූව ‘හෝස් හිල්’ ධාවන පථයේ පවත්වන ලද පළමු තරගාවලියද වීම විශේෂත්වයකි.

මාර්තු 23 සහ 24 දෙදින පුරා පැවැති තරගාවලියේ එක්ස්ට්‍රීම්, ස්ටෑන්ඩර්ඩ්, ස්ටෑන්ඩර්ඩ් මොඩිෆයිඩ් සහ ඒ.ටී.වී. යන කාණ්ඩ 4 යටතේ තරග පැවැත්විණි. තරගාවලියේ කාණ්ඩ 4 සඳහා තරගකරුවන් 45ක් සහභාගී වූ අතර 8 දෙනකු තරග වැදුණු එක්ස්ට්‍රීම් කාණ්ඩයේ දෙවන ස්ථානය වජිර දම්රන් සමගින් සම්පත් රණසිංහ දිනාගත් අතර තෙවන ස්ථානය චමින්ද සහ හසිත ප්‍රනාන්දු දිනා ගත්හ. ‘ද ස්කෝපියන්’ සමාජය සංවිධානය කරන මීළඟ තරගාවලිය තල්දූව ‘හෝස් හිල්’ ධාවන පථයේදීම අගෝස්තු මාසයේදී පැවැත්වීමට බලාපොරොත්තු වන බව එහි වත්මන් සභාපති පවර සජීව මාරසිංහ ‘අරුණ’ට අදහස් දක්වමින් සඳහන් කළේය.

•  නදුන්ක නෙත්සර, ඡායාරූප – ලලිත් පෙරේරා