පසුගිය වසරේ පැවති තරග විභාගයේ ප්රතිඵල මත විදේශ සේවයට බඳවා ගැනීමට නියමිතව සිටි හතළිස් දෙනාගේම නාමලේඛනය රාජ්ය සේවා කොමිෂන් සභාවෙන් ලබා ගෙන තිබේ.
මෙම හතළිස් දෙනාගෙන් විසි දෙනකුගේ නාමලේඛනය ලබා දෙන ලෙසට රාජ්ය සේවා කොමිෂන් සභාව මින් පෙර වාචිකව කළ ඉල්ලීමක් විභාග දෙපාර්තමේන්තුවෙන් ප්රතික්ෂේප කර තිබිණි. දෙපාර්තමේන්තුව දැනුම් දී තිබුණේ එම ඉල්ලීම ලිඛිතව ලබා දෙන ලෙස ය. කොමිෂන් සභාව හතළිස් දෙනාගේම නාමලේඛනය ලබාදෙන ලෙස දැනුම් දී තිබුණේ ඉන් පසුවය.
විසි දෙනකුගේ ප්රතිඵල පමණක් ලබා දීම දෙපාර්තමේන්තුව ප්රතික්ෂේප කර ඇත්තේ ගැසට් නිවේදනය නිකුත් කර තිබුණේ හතළිස් දෙනෙක් බඳවා ගැනීමට හෙයිනි.
හතළිස් දෙනෙක් බඳවා ගැනීම සඳහා ගෙන තිබූ තීරණය වෙනස් කර දේශපාලන හෝ වෙනත් හිතවත්කම් මත විසි දෙනෙක් බඳවා ගැනීමට සූදානමක් පවතින බවට අයදුම්කරුවෝ ද සැකපළ කළහ. ඔවුන් කියා සිටියේ ගැසට් නිවේදනය අනුව සුදුස්සන් බඳවා නොගන්නේ නම් ඊට එරෙහිව නීතිමය ක්රියාමාර්ග ගන්නා බවය.
- නිලන්ත මදුරාවල