ගාල්ල කොටුව තුළ ජූනි 1 වන දා සිට එක් පැත්තකට පමණක් රථ වාහන ධාවනය කිරීම (One way) නීතිය ක්‍රියාත්මක කිරීමට තීරණය කළ බව දකුණු පළාත් ආණ්ඩුකාර ලක්ෂ්මන් යාපා අබේවර්ධන පවසයි.
අද (මැයි 15) පෙරවරුවේ ගාලු කොටුවේ සංචාරකයන්ට සහ ජනතාවට ඇති ගැටලු සොයා බැලීම සඳහා සංචාරයකට පැමිණි අවස්ථාවේ ඔහු මේ බව සඳහන් කළේ ය.
ඔහු සඳහන් කළේ, සංචාරක ගාලු කොටුව තුළට දිනකට රථ වාහන දහස් ගණනක් ඇතුළු වන බව ත් නිසි රථ වාහන සැලැස්මක් නොමැති වීම නිසා දැඩි වාහන තදබදයක් හටගන්නා බැවින් මෙම තීරණය ගත් බව ත් ය.
ගාල්ල වැදගත් සංචාරක උරුමයක් වන අතර එය රැක ගැනීම පළාතේ ආණ්ඩුකාරයා ලෙස තමන්ගේ වගකීමක් බව ඔහු සඳහන් කළේ ය.
ආණ්ඩුකාරවරයා තවදුරට ත් සඳහන් කළේ, ගාලු කොටුව තුළ උදේ සහ සවස විශේෂ කණ්ඩායම් දෙකක් යොදවා පිරිසිදු කිරීමට කටයුතු කරන බව ය.
සංචාරකයන්ට සහ ජනතාවට හිතකර අයුරින් කොටුවේ කටයුතු පවත්වාගෙන යෑම සඳහා පොලිසිය ත්‍රිවිධ හමුදාව වෙළෙඳ ප්‍රජාව සහ ප්‍රදේශවාසීන් සහයෝගය ඇතුව වැඩපිළිවෙළක් ක්‍රියාත්මක කරන බව ද ඔහු පැවසීය.
ඒ අනුව, ජූනි 1 වන දා සිට සියලු ම රථ වාහන ගාල්ල පැරණි කොටු දොරකඩින් පමණක් ඇතුළු වීම සිදු කර අලුත් කොටු දොරකඩින් පිටවීමට සැලසුම් කර ඇති බව පොලිසිය සඳහන් කළේ ය.
- Farhan Nizamdeen – Galle
Janamina Sri Lanka Rupee Exchange Rate