ප්‍රාථමික ශ්‍රේණිවල සිසුන්ට දිවා ආහාරය . . .

රජයේ පාසල්වල 1-5 ශ්‍රේණිවල සිසුන් සඳහා “පාසල් ආහාර වැඩසටහන” ක්‍රියාත්මක කිරීමට කැබිනට් අනුමැතිය හිමි වී තිබේ.

සමස්ත පාසල් සිසුන් මිලියන 1.08ක් ආවරණය වන පරිදි දිවයිනේ අධ්‍යාපන කලාප 100ට අයත් පාසල් 7,902ක පාසල් ආහාර වැඩසටහන ක්‍රියාත්මක කරනු ලබන අතර, එක් සිසුවෙකු සඳහා දිනක ආහාර වේලක් වෙනුවෙන් රුපියල් 85ක මුදලක් වෙන් කර තිබේ.

වෙළෙඳපොළ තුළ සිදුවන භාණ්ඩ හා සේවාවන්හි මිල උචිඡාවචනය අනුව එක් අහාර වේලක් සඳහා අවම වශයෙන් රුපියල් 110ක පමණ මුදලක් වැය වන බව මේ සම්බන්ධයෙන් අධ්‍යයනය කිරීම සඳහා පත් කළ නිලධාරී කමිටුව විසින් වාර්තා කරනු ලැබ ඇත.

එසේ ම “පාසල් ආහාර වැඩසටහන” වෙනුවෙන් Save the Children සංවිධානය මගින් 2024 වර්ෂය සඳහා තෝරාගත් පාසැල් 917න් සිසුන් ලක්ෂ 2කට අහාර ද්‍රව්‍ය වර්ග 3ක් ලබා දීමට ඒකඟතාව පළ කර තිබේ.

ඒ අනුව එක් අහාර වේලක් වෙනුවෙන් එක් සිසුවෙකු සඳහා වැය වන මුදල රුපියල් 110 දක්වා වැඩි කිරීමටත්, ප්‍රාථමික අංශයේ සිසුන් සඳහා 2024 වර්ෂය තුළ දින 170ක් සඳහා “පාසල් ආහාර වැඩසටහන” ක්‍රියාත්මක කිරීමටත් අධ්‍යාපන අමාත්‍යවරයා ඉදිරිපත් කළ යෝජනව අමාත්‍ය මණ්ඩලය විසින් අනුමත කරනු ලැබ ඇත.

• Tharaka Samman