බලන්ගොඩ මූලික රෝහලේ මෘත ශරිශාරගාරයේ පැවැති පශ්චාත් මරණ පරීක්ෂණයකදී 59 හැවිරිදි පුද්ගලයකුගේ පෙණහල්ලේ තිබී දතක් හමු වූ පුවතක් ඊයේ (27 වැනිදා) වාර්තා විය.
මෙම පුද්ගලයා කාලයක සිට නිව්මෝනියාව සහ වකුගඩු රෝගී තත්ත්වයෙන් පෙළෙමින් සිට ඇත. ඔහු මරණයට පත්ව තිබෙන අතර පශ්චාත් මරණ පරීක්ෂණ බලන්ගොඩ මූලික රෝහලේදී සිදුකෙරිණි. බලන්ගොඩ මූලික රෝහලේ අධිකරණ වෛද්‍ය නිලධාරිනි ඩී. චේති සත්‍ය විසින් පශ්චාත් මරණ පරීක්ෂණය සිදුකළ අවස්ථාවේදී දතක් පෙණහල්ලේ තිබී හමු වූ බව බලන්ගොඩ හදිසි මරණ පරීක්ෂක පත්මෙන්ද්‍ර විජේතිලක ප්‍රකාශ කළේය.
මෙසේ මියගොස් ඇත්තේ බලන්ගොඩ පින්නවල පොලිස් බල ප්‍රදේශයේ වලේබොඩ ප්‍රදේශයේ පදිංචිව සිටි එස්. කරුණාරත්න නැමැති අයකුය.
මෙම පුද්ගලයා මත්පැන් පානය කිරීමට ඇබ්බැහි වී ඇති පුද්ගලයකු බවත් කාලයක් තිස්සේ නිව්මෝනියාව රෝගයෙන් සහ වකුගඩු රෝගී තත්ත්වයන් පෙළෙමින් සිට ඇති බවත් නිව්මෝනියාව උස්සන්න වීම හේතුවෙන් මියගොස් ඇති බවට පශ්චාත් මරණ පරීක්ෂණයේදී අණාවරණය වූ බවත් බලන්ගොඩ හදිසි මරණ පරීක්ෂක කීය. වසර කිහිපයකට පෙර ඔහුගේ මුඛයෙන් දතක් ගැලවී ගොස් පෙණහල්ලේ සිර වී ඇති බවට සැකකෙරෙන බවද ඔහු කීය. හදිසි මරණ පරීක්ෂකවරයා වැඩිදුරටත් පැවැසුවේ තමන්ගේ සිරුර සම්බන්ධයෙන්වත් මොහු සැලකිල්ලක් දක්වා නොමැති බවය.
බලන්ගොඩ පින්නවල පොලිසියේ පොලිස් සැරයන් මිල්ලගහගොඩ (60507) සාක්ෂි මෙහෙයවිම සිදුකළේය.
- එන්.එස්. ප්‍රියනන්දන – බලන්ගොඩ
Janamina Sri Lanka Rupee Exchange Rate