බැල්ටිමෝර් නුවර පාලම කඩා වැටීමෙන් සිදු වූ හානිය සඳහා වන රක්ෂණ මුදල අමෙරිකානු ඩොලර් බිලියන 3 ඉක්මවනු ඇතැයි ද, එය එතෙක් මෙතෙක් ඉතිහාසයේ තනි අනතුරකට ගෙවනු ලබන විශාලතම සමුද්‍ර රක්ෂණය වනු ඇතැයි ද විදෙස් මාධ්‍ය වාර්තා කළේය. බැල්ටිමෝර් වරායේ සිට ගමන් ආරම්භ කළ සිංගප්පූරුවට අයත් භාණ්ඩ නෞකාවක් ගැටීමෙන් ෆ්‍රැන්සිස් ස්කොට් කී නමැති එම පාලම මුළුමනින්ම කඩා වැටුණු අතර, පුද්ගලයන් 6 දෙනකු ජීවිතක්ෂයට පත්වූ බව ද වාර්තා විය.
කඩා වැටුණු පාලම මෙන්ම ඊට මුල් වූ නෞකාව ද රක්ෂණය කර ඇති බැවින් අනතුරේ මූල්‍යමය පාඩුව පියවා ගැනීමට හැකි වුවද, පාලම කඩා වැටීමෙන් වරායේ භාණ්ඩ ප්‍රවාහන මෙහෙයුමට සිදු වූ පාඩුව පියවා ගැනීමට නොහැකි විශාල අර්බුදයක් වනු ඇතැයි ද විදෙස් මාධ්‍ය වැඩිදුරටත් වාර්තා කළේය.
පසුගිය වසරේදී පමණක් අමෙරිකානු ඩොලර් බිලියන 80ක භාණ්ඩ හුවමාරු වූ මේ වරාය ජාතික සහ ජාත්‍යන්තර ආර්ථිකයේ වැදගත් සැපයුම් මාර්ගයක් බවත් මේරිලන්ඩ් පළාතේ ආණ්ඩුකාර ආණ්ඩුකාර වෙස් මුවර් ප්‍රකාශ කර තිබිණි. පාලමෙහි සුන්බුන් ඉවත් කර වරායේ පිවිසුම් මාර්ගය යළි විවෘත කරන තුරු ඩොලර් මිලියන 15ක පමණ දෛනික පාඩුවක් විඳ ගැනීමට සිදුවනු ඇතැයි ද වාර්තා වේ.
- dinamina
Janamina Sri Lanka Rupee Exchange Rate