ජනක රත්නායකගෙන් කප්පම් ගත් සිද්ධියේ සුලමුල . . .

මහජන උපයෝගිතා කොමිසමේ හිටපු සභාපති ජනක රත්නායකගෙන් රුපියල් ලක්‍ෂ 15ක මුදලක් කප්පම් ලබාගත් සිද්ධියට අදාළ තුන් දෙනෙකු කොළඹ අපරාධ කොට්ඨාසයෙන් අත්අඩංගුවට ගෙන ඇත.

ඒ, ජනක රත්නායක කිරුළපන පොලිසියට කරන ලද පැමිණිල්ලක් කොළඹ අපරාධ කොට්ඨාසයෙන් විමර්ශන කිරීමෙන් අනතුරුව ය.

රත්නායක ගෙන් කප්පම් ලබා ගැනීමට පැමිණි මෝටර් රථය පැදවූ රියැදුරාත් කප්පම්කරුවන්ට රැඳී සිටීමට නේවාසික පහසුකම් දුන් පුද්ගලයන් දෙදෙනාත් කොළඹ අපරාධ කොට්ඨාසයෙන් රඹුක්කනදී අත්අඩංගුවට ගෙන ඇත.

අත්අඩංගුවට ගත් තිදෙනා අවුරුදු 24, 26 සහ 31 වයස්වල පසුවන අතර රඹුක්කන සහ කුරුණෑගල ප්‍රදේශවල පදිංචිකරුවෝ වෙති.

2023.10.16 දින පාතාල නායකයෙකු වන බ්ලූමැන්ඩල් සංඛ යැයි කියාගත් පුද්ගලයෙකු සිය ජංගම දුරකතනයට ඇමතුමක් දෙමින් ජනක රත්නායක ට පවසා ඇත්තේ, ඔහු ඝාතනය කිරීමට රුපියල් මිලියන 8ක කොන්ත්‍රාත්තුවක් ලැබුණු බව ය.

එමෙන් ම, එම කොන්ත්‍රාත්තුව ක්‍රියාත්මක නොකිරීමට මහජන උපයෝගිතා කොමිෂන් සභාවේ හිටපු සභාපතිවරයාගෙන් රුපියල් මිලියන 1.5ක මුදලක් ද සංඛ නැමැත්තා ඉල්ලා ඇත.

දුරකතනයෙන් ලද තොරතුරට අනුව රුපියල් මිලියන 1.5ක මුදලක් කිරුළපන පෞද්ගලික බැංකු ශාඛාවක් අසලට ඔහු සේවකයෙකු අත යැවූ අතර නිල් පැහැති ඇල්ටෝ මෝටර් රථයකින් පැමිණි පුද්ගලයන් දෙදෙනකු එම මුදල් ලබා ගත් බව පොලිසියට දැනුම් දී තිබිණි.

සිද්ධිය සම්බන්ධයෙන් කොළඹ අපරාධ කොට්ඨාසය වැඩිදුර විමර්ශන පවත්වයි.

•  Keerthi Mendis