දරු උපත්වලදී ඉතා කළාතුරකින් දක්නට ලැබෙන කොඳු ඇට පෙළ අසාමාන්‍ය ලෙස දික් වීමේ සහලක්ෂණ සහිත දරු උපතක් චීනයේ සිදු වී ඇතැයි විදෙස් මාධ්‍ය වාර්තා කළේය. කොඳුඇටපෙළ වලිග කොටසක් මෙන් පිටතට නෙරා පැවතීම එම සහලක්ෂණය වන බවත්, එම තත්ත්වය යටතේ චීනයේ හැංෂූ ප්‍රාන්තයේ රෝහලක මීට දින කිහිපයකට පෙර එම දරු උපත සිදු වී ඇති බවත් වාර්තා වේ. දරුවාගේ වර්ධනයත් සමඟ දින කිහිපයකදී එය වර්ධනය වී සෙන්ටිමීටර් 10ක පමණ වලිග කොටසක් මෙන් පෙන්නුම් කරන බවත් විදෙස් මාධ්‍ය වැඩිදුරටත් වාර්තා කළේය.
Tethered Spinal Cord නමැති ඉතා දුර්ලභ මේ සහලක්ෂණය සහිත දරුවාගේ තත්ත්වය පරීක්ෂා කළ වෛද්‍යවරු විමතියට පත් වී ඇති අතර, එම වලිග කොටස සහිත දරුවාගේ වීඩියෝ පටයක් ද රෝහලේ ළමා සැත්කම් සම්බන්ධ නියෝජ්‍ය ප්‍රධාන වෛද්‍ය ලී සමාජ මාධ්‍යයට මුදා හැර ඇතැයි වාර්තා වේ.
දරුවාගේ කොඳුඇටපෙළ අතුරින් පිටතට නෙරා ඇති එම වලිග කොටස සැත්කමකින් ඉවත් කිරිමට මාපියන් විසින් ඉල්ලීමක් කරනු ලැබුවද, වෛද්‍යවරු එම ඉල්ලීම ප්‍රතික්ෂේප කර ඇතැයි ද වාර්තා වේ. එය දරුවාගේ ස්නායු පද්ධතිය සමඟ සෘජුවම සම්බන්ධ බැවින් එය ඉවත් කිරීමෙන් දරුවා සදාකාලික ආබාධිතයකු බවට පත්වීමට හෝ වෙනත් ආබාධ ඇතිවීමට හේතු වනු ඇතැයි වෛද්‍යවරු නිගමනය කර ඇති බවත් වාර්තා වේ. එහෙත් මෙවැනිම සහලක්ෂණ සහිත දින දහයක බිළිඳු දරුවකුගේ කොඳුඇටපෙළ අතුරින් පිටතට නෙරා තිබූ වලිග කොටස සැත්කමක් මගින් සාර්ථකව ඉවත් කිරිමට පසුගිය වසරේ ජූනි මාසයේදී දකුණු අමෙරිකාවේ වෛද්‍යවරු සමත් වී තිබූ බවත් විදෙස් මාධ්‍ය වැඩිදුරටත් වාර්තා කළේය.
- dinamina
Janamina Sri Lanka Rupee Exchange Rate