දේශපාලන කෝණයෙන් බලා විපක්ෂයේ මන්ත්රීවරුන් පිරිසක් කෝප් කමිටු සාමාජිකත්වයෙන් ඉවත්වුවත් එහි සභාපති වශයෙන් ස්වාධීනව තමාට තිබෙන වගකීම නිසි ලෙස ඉටු කරගෙන යන බව කෝප් කමිටු සභාපති රෝහිත අබේගුණවර්ධන ‘මව්බිම’ට පැවසීය.
කෝප් කමිටු සාමාජිකත්වයෙන් ඉවත් වීම මහජන නියෝජිතයෙකු වශයෙන් සිය වගකීම පැහැරහැරීමක් වනු ඇතැයි ද හෙතෙම සඳහන් කළේය.
දේශපාලන කෝණයෙන් බලා විපක්ෂයේ මන්ත්රීරුවරුන් කිහිප දෙනෙකු මෙලෙස ඉවත් වී ඇති බවත් සාමාජිකත්වයෙන් යම් මන්ත්රීවරයෙකු ඉවත්වූයේ නම් ඒ වෙනුවට මන්ත්රීවරයෙකු නම් කළ යුතු බවත් එය පාර්ලිමේන්තු සම්ප්රදාය බවත් පැවසීය.
තමා දේශපාලන වේදිකාවේදී නියෝජනය කරන පක්ෂයට අනුව කටයුතු කළත් කෝප් කමිටු සභාපති වශයෙන් පක්ෂ, පාට, භේද නොබලා ස්වාධීන පුද්ගලයෙකු වශයෙන් සිය කාර්යභාරය ඉටුකරන බවත් සඳහන් කළේ ය.
කෝප් කමිටු සභාපති වශයෙන් තමාගෙන් සිදුවන කාර්යභාරය ජනතාව විනිශ්චය කරනු ඇති බවත් ප්රාදේශීය සභාව, පළාත් සභාව නියෝජනය කරමින් දේශපාලනයට පිවිසි තමාට පාර්ලිමේන්තු මන්ත්රීවරයෙකු, රාජ්ය ඇමතිවරයෙකු, නියෝජ්ය ඇමැතිවරයෙකු, කැබිනට් ඇමැතිවරයෙකු වශයෙන් දීර්ඝ පළපුරුද්දක් තිබෙන බවත් වැඩිදුරටත් කීය.
පාර්ලිමේන්තු මන්ත්රි රෝහිත අබේගුණවර්ධන කෝප් කමිටු සභාපති ධූරයට පත්වීමට විරෝධය පළ කරමින් පෙරේදා (මාර්තු 19) කෝප් කමිටුව රැස්වීමෙන් පසු විපක්ෂයේ මන්ත්රීවරුන් කිහිප දෙනෙකු එහි සාමාජිකත්වයෙන් ඉවත් වීම සම්බන්ධයෙන් ‘මව්බිම’ කළ විමසුමකදී මන්ත්රීවරයා මෙම කරුණ සඳහන් කළේ ය.
- අනුර බාලසූරිය