මොරොක්කෝවේ සිදු වූ ප්රබල භූ කම්පනයෙන් මියගිය ගණන 2,000 ඉක්මවා ගොස් තිබේ. විදෙස් මාධ්ය වාර්තා කළේ, තුවාල ලැබූ පුද්ගලයින් ගණන ද ඒ හා සමාන සංඛ්යාවක් වන බව ය.
එරට අභ්යන්තර කටයුතු අමාත්යංශය සඳහන් කර ඇත්තේ, ඉන් බරපතළ තුවාල ලැබූවන් ගණන 1,400 ඉක්මවන බව ය.
මධ්යම මොරොක්කෝවට බලපෑ රික්ටර් මාපක 6.8ක ප්රබල භූමිකම්පාවෙන් වැඩි ම බලපෑමක් එල්ල වී ඇත්තේ, මරකේෂ් නගරයට දකුණින් පිහිටි ප්රදේශවලට ය.
එරට, හය වන මොහොමඩ් රජු දින තුනක ජාතික ශෝක කාලයක් ප්රකාශයට පත් කර ඇති අතර දිවි ගලවා ගත් අයට නවාතැන්, ආහාර සහ වෙනත් උපකාර ලබා දෙන ලෙසට නියම කර ඇතැයි විදෙස් මාධ්ය වාර්තා කර ඇත.
එම වාර්තා පෙන්වා දුන්නේ, බොහෝ අය එළිමහනේ සිය දෙවන රාත්රිය ගත කරමින් සිටි බව ය.
සිකුරාදා රාත්රියේ මෙම භූ කම්පනය හට ගෙන තිබුණු අතර ඉන් අනතුරුව පසුකම්පනයක් ද හට ගෙන තිබිණි.