උඩ ගිය බිත්තරේ . . .

බිත්තර මිල කෘත්‍රිම ලෙස ඉහළ  දැමීමට මුල්  වුණේ බලවත් දේශපාලකයෙකුගේ  ඥාතියෙකු වන  ජා-ඇළ ප්‍රදේශයේ ශීතාගාර හිමියෙකු යැයි වෙළෙඳපොළ ආරංචි මාර්ග පවසයි.

මීට සති දෙකකට පමණ ඉහතදීත් රුපියල් 38ක උපරිම සිල්ලර මිලට පැවති බිත්තරයක මිල රුපියල් 50කට අලෙවි කිරීමට ඔහු ගත් උත්සහය හමුවේ ගොවිපොළ හිමියන් බිත්තර තොග මිල රුපියල් 42ක් දක්වා ඉහළ දැමීමෙන් පසු වෙළෙඳපොළ තරගයක් හටගැනීම මේ තත්ත්වයට බලපෑවේ යැයි වාර්තා වේ.

ජා-ඇළ ශීතාගාරයක් හිමි අතරමැදියෙකු බිත්තරයෙන් එතරම් වාසියක් තබා ගැනීම තමන්ට කරන අසාධාරණයක් යැයි සැලකූ ගොවිපොළ හිමියන් ඊළඟ සතියේදී ම බිත්තර මිල මෙසේ රුපියල් 40-42ක් දක්වා ඉහළ දැමී යැයි ද ඉන් පසුව ජා-ඇළ අතරමැදි ව්‍යාපාරිකයන් බිත්තර තොග මිල රුපියල් 60-62 දක්වා ඉහළ දැමී යැයි ද මේ සම්බන්ධයෙන් අදහස් දැක්වූ වෙළෙඳපළ ප්‍රකාශකයෙක් කීවේ ය.

මේ පිළිබඳ කළ විමසීමේදී තමන් වෙළෙඳ, වාණිජ හා ආහාර සුරක්ෂිතතා අමාත්‍යවරයාව දැනුවත් කළ ද ඊට නිහඬව සිටි ඔහු බිත්තර මිල ඉහළ යාමට පිළියම් වශයෙන් ලබන වසරේ අප්‍රේල් මාසය දක්වා බිත්තර ආනයනය දීර්ඝ කිරීමට පියවර ගත් බවත් ජාතික පාරිභෝගික පෙරමුණේ සභාපති අසේල සම්පත් පැවසීය.

කුකුළු ගොවිපොළ හිමියන් මේ සිදුවීම දැන සිටියත් ඔවුන් කිසිදු ඉහළ නිලධාරියෙකු දැනුවත් නොකළ බවත් මේ වන විට රුපියල් 400ක් වැනි මිලකට බිත්තර දමන කිකිළියන් මස් පිණිස අලෙවි කරමින් ඇති බවත් ඔහු පැවසීය.

• Irosha Deepani