පවතින අයහපත් කාලගුණ තත්ත්වය හේතුවෙන් යාල වනෝද්‍යානය දින නියමයක් නොමැතිව වසා දමන බව යාල උද්‍යාන භාරකරු මනෝජ් විද්‍යාරත්න පවසයි.
ඔහු සඳහන් කළේ, යාල වනෝද්‍යානයේ සංචාරකයින් ගමන් කරන උද්‍යාන භූමියෙන් 75%ක පමණ ප්‍රදේශයක් ජලයෙන් යටවීම හා සෆාරි ජීප් රථ ගමන් ගන්නා මාර්ග ද ජලයෙන් යටවීම හේතුවෙන් දින නියමයක් නොමැතිව උද්‍යානය වසා තැබීමට තීරණය කළ බව ය.
උද්‍යානයට ඇතුළු වන පලටුපාන ප්‍රධාන පිවිසුම් දොරටුව ප්‍රදේශය ද ජලයෙන් යටවී ඇති අතර උද්‍යානයේ ඇති සංචාරක නිවාසවල සිටි සියලු ම සංචාරකයන් සහ කාර්ය මණ්ඩලය ද එම ස්ථානවලින් ඉවත් කළ බව ඔහු තවදුරට ත් සඳහන් කළේ ය.
තිස්සමහාරාම ප්‍රදේශයෙන් යාල උද්‍යානයට ඇතුළු වන පිවිසුම් දෙක ද ජලයෙන් යටවී ඇති අතර උද්‍යානයේ ඇති සියලු ම වැව් හා මැණික් ගඟ ද පිටාර ගැලීම හේතුවෙන් උද්‍යානය ජලයෙන් යටවී ඇති බව උද්‍යාන භාරකරු මනෝජ් විද්‍යාරත්න පැවසීය.
ඔහු සඳහන් කළේ, මෙම කාල සීමාව සංචාරකයන් පැමිණෙන බැවින් සියලු ම සංචාරක බංගලා වෙන් කර ඇති බව ත් එම සංචාරකයින්ට යාල කලාප 4,5,6,හා උඩවලව ලුණුගම්වෙහෙර කලාපවල සංචාරය කළ හැකි බවත් ය.
මේ අතර, කටගමුව පිවිසුම විවෘතව ඇති බැවින් එම ප්‍රදේශයේ ද සංචාරය කිරීමට බාධාවක් නොමැති බව ඔහු වැඩිදුරට ත් සඳහන් කළේ ය.
- ආරියපාල රත්නායක – කතරගම, අසිත වීරසිංහ – තිස්සමහාරාම
Janamina Sri Lanka Rupee Exchange Rate