මෙවර අ.පො.ස. උසස් පෙළ විභාගයේ කෘෂි විද්‍යාව ප්‍රශ්න පත්‍ර දෙක ම විභාග පැවැත්වීමට පෙර පිට කර සමාජ මාධ්‍ය වෙත මුදාහළ විභාග ශාලාධිපතිවරයෙකුගේ කාර්යාල කාර්ය සහායකවරයෙකු අපරාධ පරීක්ෂණ දෙපාර්තමේන්තුවෙන් අත්අඩංගුවට ගෙන ඇත.
මොහු මොරටුව ප්‍රදේශයේ පාසලක විභාග ශාලාධිපතිවරයාගේ කාර්යාල කාර්ය සහායක ලෙස කටයුතු කරමින් සිටි අයෙකු බව මේ සම්බන්ධයෙන් කළ විමසුමකදී පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නීතිඥ නිහාල් තල්දුව ‘මව්බිම’ට පැවසීය.
මෙම ප්‍රශ්න පත්‍ර පිටකිරීමේ සිද්ධියේ දැනට හඳුනාගෙන ඇති ප්‍රධාන සැකකරු මොහු වන අතර මූල්‍ය ලාභයක් පදනම් කරමින් මොහු මෙම ක්‍රියාව කර ඇති බව ද විමර්ශන නිලධාරීහු සැක පළ කරති.
මොහු 38 හැවිරිදි වියෙහි පසුවන අයෙකු බවත් ඔහුගේ පදිංචිය මොරටු ප්‍රදේශය බවත් පොලිස් මාධ්‍ය ප්‍රකාශකවරයා සඳහන් කළේ ය.
සමාජ මාධ්‍ය ඔස්සේ කළ සංකීර්ණ විමර්ශනයකින් පසු මොහු අත්අඩංගුවට ගෙන ඇති අතර අපරාධ පරීක්ෂණ දෙපාර්තමේන්තු නිලධාරීහු ඊයේ පස්වරුව වන විටත් ප්‍රශ්න කරමින් සිටියහ.
කෘෂි විද්‍යාව පළමු ප්‍රශ්න පත්‍රය වන, බහුවර්ණ ප්‍රශ්න 50කින් සැදුම්ලත් ප්‍රශ්න පත්‍රයේ ප්‍රශ්න 16ක් පිට වී ඇති බවත් එය මුල් ප්‍රශ්න පත්‍රයෙන් ම ඡායාරූප ගෙන පිට කොට ඇති බවත් ‘මව්බිම’ අනාවරණය කළේ ය.
කෘෂි විද්‍යාව දෙවන ප්‍රශ්න පත්‍රය පිටවීම සම්බන්ධයෙන් විභාග කොමසාරිස්වරයා කළ පැමිණිල්ලකට අනුව විමර්ශන ඇරඹි අපරාධ පරීක්ෂණ දෙපාර්තමේන්තුව ඉකුත් 13 දින සමාජ මාධ්‍ය ඔස්සේ බෙදාහැරි අම්පාර ප්‍රසිද්ධ පාසලක කෘෂිවිද්‍යා ගුරුවරයා අත්අඩංගුවට ගැනීමට සමත් විය. ඔහු අම්පාර ප්‍රදේශයේ උපකාරක පන්ති පවත්වන ගුරුවරයෙකු බවට ද විමර්ශනවලදී අනාවරණය විය.
සැකකාර ගුරුවරයා අම්පාර මහේස්ත්‍රාත් අධිකරණයට ඉදිරිපත් කිරීමෙන් අනතුරුව ලබන 26 වන දා දක්වා රක්ෂිත බන්ධනාගාරගත කර කොට ඇති අතර ඔහු ද වට්ස්ඇප් ඔස්සේ දෙවන ප්‍රශ්න පත්‍රය ගෙන එය ඔහුගේ අත්අකුරින් ලියා සිසුන් වෙත බෙදා හැර තිබේ.
මෙවර උසස් පෙළ විභාගයේ කෘෂි විද්‍යාව ප්‍රශ්න පත්‍රයේ 1 කොටස ජනවාරි 8 වන දා නිකුත් කළ අතර එහි දෙවන කොටස ජනවාරි 10 වන දා නිකුත් කළේ ය.
මෙම විභාග පැවැත්වීමට පෙර මොරටු ප්‍රදේශයේ විභාග මධ්‍යස්ථානය තුළදී මෙහි ප්‍රධාන සැකකරු වන කාර්යාල කාර්ය සහායක ප්‍රශ්න පත්‍රවල ඡායාරූප ගෙන එය සමාජ මාධ්‍ය ඔස්සේ පිට කර ඇත.
ඔහුගේ ප්‍රකාශ මත සෙසු සැකකරුවන් අත්අඩංගුවට ගැනීම සඳහා විමර්ශන අපරාධ පරීක්ෂණ දෙපාර්තමේන්තුව අරඹා ඇත.
කෘෂි විද්‍යාව ප්‍රශ්න පත්‍රයේ දෙවන කොටස සමාජ මාධ්‍ය ඔස්සේ සංසරණය වීමට අදාළව ලද තොරතුරු මත විභාග කොමසාරිස් ජනරාල් අමිත් ජයසුන්දර විසින් ඉකුත් 12 වන දින මෙම දෙවන ප්‍රශ්න පත්‍රයට පමණක් අදාළ සියලු මාධ්‍යයන්හි විභාග අත්හිටුවූ අතර ඒ සඳහා වෙනත් දිනයක් ලබාදෙන බව නිවේදනය කළේ ය.
කෙසේ නමුත් කෘෂි විද්‍යා පළමු ප්‍රශ්න පත්‍රය සම්බන්ධයෙන් මෙතෙක් විභාග දෙපාර්තමේන්තුව නිල ප්‍රකාශයක් කර නොමැත.
Janamina Sri Lanka Rupee Exchange Rate