බුදු දහමට අපහාස කිරීම සම්බන්ධයෙන් රක්ෂිත බන්ධනාගාරගතව සිට ඇප මත මුදාහැර සිටින විශ්ව බුද්ධිමුණි හෙවත් රත්නපුරේ විමල බුද්ධි යන තැනැත්තා අධිකරණයේ අවවාද නොතකා තවදුරටත් එකී ක්රියාකාරකම්වල නිරත වන බව කියන සිද්ධියට අදාළව ඔහුව මෙම මස 24 දින අධිකරණය හමුවට ඉදිරිපත් කිරීමට පියවර ගන්නා ලෙස කොළඹ ප්රධාන මහේස්ත්රාත් ප්රසන්න අල්විස් අපරාධ පරීක්ෂණ දෙපාර්තමේන්තුවට ඊයේ (ජන. 18) නියෝග කළේ ය.
ටික් ටොක් සමාජ මාධ්ය ජාලාව උපයෝගි කර ගනිමින් බුදු දහමට නිගාවක් වන ආකාරයේ ක්රියාකාරකම්වල යෙදීම හා චීවරය සුනඛයෙකුට පෙරවීම ඇතුළු චෝදනා කිහිපයක් යටතේ අපරාධ පරීක්ෂණ දෙපාර්තමේන්තුව මගින් පසුගිය දිනෙක අත්අඩංගුවට ගත් මෙම චීවරධාරියා රක්ෂිත බන්ධනාගාරගත කර සිට මුදාහැරීමෙන් අනතුරුවද අධිකරණයේ අවවාද නොතකා ඔහු නැවත නැවතත් එකී ක්රියාකාරකම්වල යෙදෙන බවට කරුණු අනාවරණය වී ඇති බැවින් මෙම සැකකාර චීවරධාරියා අධිකරණය හමුවට ඉදිරිපත් කිරීම සඳහා නියෝගයක් ලබාදෙන ලෙස අපරාධ පරීක්ෂණ දෙපාර්තමේන්තුව කළ ඉල්ලීමක් සලකා බැලීමෙන් අනතුරුව අධිකරණයෙන් එසේ නියම කෙරිණි.
අංක 1/32, තිහාරිය, කලගෙඩිහේන, ලිපිනයෙහි රැඳී සිටි බව කියන විශ්ව බුද්ධිමුණි හෙවත් රත්නපුරේ විමල බුද්ධි නමැති චීවරධාරියෙකුට අධිකරණය හමුවේ පෙනී සිටීමට එසේ නියෝග කෙරිණි. සිවිල් හා දේශපාලන අයිතිවාසිකම් පිළිබඳ සම්මුති පනත යටතේ සැකකරුට එරෙහිව නඩු පැවැරීමට නොහැකි වුව ද දණ්ඩ නීති සංග්රහයේ 290 වගන්තිය යටතේ සැකකරුට එරෙහිව නඩු පැවැරීමට හැකියාව ඇති බව පෙන්වා දෙමින් මහේස්ත්රාත්වරයා පෙර නඩු වාරයේදී සැකකාර චීවරධාරියා ඇප මත මුදාහැර තිබිණි.
මෙම සැකකරුගේ ගිණුම්වලට පසුගිය කාලයේ මුදල් ලැබී ඇත්තේ කෙසේ ද යන්න පිළිබඳව තවදුරටත් විමර්ශන සිදුකර අධිකරණයට කරුණු වාර්තා කරන බව ද අපරාධ පරීක්ෂණ දෙපාර්තමේන්තුව පෙර නඩු වාරයේදී අධිකරණයට දැනුම් දී තිබිණි.