ලොතරැයි සඳහා මෙතෙක් දුන් ශත 50 ක කොමිස් මුදල අඛණ්ඩව දෙන ලෙස ඉල්ලමින් ක්‍රියාත්මක කර ඇති වර්ජනය හෙට (8) දිනයේ ද ක්‍රියාත්මක කරන බව සමස්ත ලංකා ලොතරැයි අළෙවි නියෝජිතයන්ගේ සංගමයේ ප්‍රකාශකයෙක් අද (7) පස්වරුවේ පැවසීය.
වර්ජනය අවසන් කළේ යැයි ලොතරැයි ආයතන දෙකම බොරු ප්‍රචාර සමාජගත කරමින් සිටින බවත් මෙතෙක් දුන් ශත 50 ක කොමිස් මුදල ඉල්ලා අනිද්දා (9) කොළඹ කොටුවේදී විරෝධතාවක් පවත්වන බවත් එම නියෝජිතයා වැඩි දුරටත් කීය.
සමස්ත ලංකා ලොතරැයි අළෙවි නියෝජිතයන්ගේ සංගමය ක්‍රියාත්මක කළ වර්ජනය අත්හිටුවූයේ යැයි එම සංගමය දැනුම් දුන් බව සංවර්ධන ලොතරැයි මණ්ඩලයේ නියෝජ්‍ය සාමාන්‍යාධිකාරීවරයා ඊයේ පස්වරුවේ ‘ලංකාදීප’යට පැවසීය.
වර්ජනය සති දෙකකට කල් දමන බව ද දන්වා ඇති බව ද නියෝජ්‍ය සාමාන්‍යාධිකාරීවරයා කීය.
ලොතරැයි පතක මිල රුපියල් 20 සිට 40 දක්වා ඉහළ දමන විට ලොතරැයි අළෙවි නියෝජිතයන්ගේ කොමිස් මුදල රුපියල් 3.75 සිට රුපියල් 7.50 ක් දක්වා ඉහළ නැංවූ බවත් ඒ අවස්ථාවේදී විශේෂ දීමනාවක් ලෙස දුන් ශත 50 ක කොමිස මුදල පමණක් අත්හිටුවා ඇති බවත් නියෝජ්‍ය සාමාන්‍යාධිකාරීවරයා වැඩි දුරටත් සඳහන් කළේය.
මෙම ගැටලුව සම්බන්ධයෙන් සාකච්ඡා කළ බව කී නියෝජ්‍ය සාමාන්‍යාධිකාරීවරයා මේ අවස්ථාවේදී එම විශේෂ දීමනාව දියනොහැකි යැයි ඔවුන්ට පැවසූ බව ද සඳහන් කළේය.
- යොහාන් භාසුර
Janamina Sri Lanka Rupee Exchange Rate