හල්පෙ කටාන ගබඩාවක තිබී මහජන සෞඛ්‍ය පරීක්ෂකවරුන් පිරිසක් විසින් අත් අඩංගුවට ගෙන තිබූ රුපියල් කෝටි අටක් පමණ වටිනා මිනිස් පාරිභෝජයට නුසුදුසු ටූනා වර්ගයට අයත් මාළු කිලෝ එක් ලක්ෂ තිස් පන් දහසක පමණ ප්‍රමාණයක් මීගමුව අතිරේක මහේස්ත්‍රාත් දර්ශිමා ප්‍රේමරත්න ගේ නිරීක්ෂණය යටතේ කොච්චිකඩේ කසළ අංගනයේ දී ඊයේ (04) ලාම්පු තෙල් දමා වල දමා විනාශ කර තිබෙයි.
දැනට වසර එක හමාරකට පමණ පෙර හල්පෙ කටාන කුලියට මස් මාළු ගබඩා කරන ස්ථානයක් විදේශ රටකින් ගෙන ආ බව කියන මිනිස් පාරිභෝජනයට නුසුදුසු මාළු තොගයක් අධි ශීතකරණ තුල ගබඩා කර ඇති බවට ලද තොරතුරකට අනුව දිවුලපිටිය කෝන්ගොඩමුල්ල මහජන සෞඛ්‍ය පරීක්ෂක ආනන්ද සිරිවර්ධන ප්‍රමුඛ මහජන සෞඛ්‍ය පරීක්ෂකවරුන් පිරිසක් විසින් වැටලීම සිදු කොට එම මාළු මිනිස් පාරිභෝජනයට නුසුදුසු බවට සැකකරු එම අධිශීතකරණ මුද්‍රා තබා පුද්ගලයින් දෙදෙනෙකුට එරෙහි නඩු පවරා තිබුණි.
අධිකරණ නියෝග පරිදි මාළු සාම්පල් නාරා ආයතනයට, රජයේ රස පරීක්ෂකවරයාට හා වෛද්‍ය පර්යේෂණ ආයතනයට පරීක්ෂණ සදහා යවා තිබිණ.
එම මාළු මිනිස් පාරිභෝජනයට නුසුදුසු බවට පරීක්ෂණ වාර්තා ඒවා තිබුණත් මීගමුව ප්‍රදේශයේ පදිංචි විත්තිකරුවන් දෙදෙනා නිවැරැදි කරුවන් බවට ප්‍රකාශ කිරීම හේතුවෙන් වසරක පමණ කාලයක් නඩුව විභාග කර අවසානයේ ඔවුන් දෙදෙනා වරදකරුවන් බවට තීරණය කර එක් අයෙකුට රුපියල් දස දහස බැගින් දෙදෙනාට රුපියල් විසි දහසක දඩ නියම කර මාළු තොගය විනාශ කිරීමට නියෝග කර තිබිණ.
මේ අනුව දිවුලපිටිය පරිපාලන මහජන සෞඛ්‍ය පරීක්ෂක අරුණ රන්දෙනිය හා එහි මහජන සෞඛ්‍ය පරීක්ෂක ඇම් පී අයි සෙනෙවිරත්න ප්‍රමූඛ මහජන සෞඛ්‍ය පරීක්ෂකවරුන් පිරිසක් විසින් ලොරි වලින් එම මාළු තොගය කොච්චිකඩේ කසළ අංගනයට ප්‍රවාහනය කර බැකෝ යන්ත්‍ර උපයෝගී කර ගෙන විශාල වලවල් කපා මාළු එම වළවල්වලට දමා අතිරේක මහේස්ත්‍රාත් දර්ශිමා ප්‍රේමරත්න ඉදිරියේ ලාම්පු තෙල් දමා විනාශ කර වල දමනු ලැබීය.
- dinamina
Janamina Sri Lanka Rupee Exchange Rate