අලුත් ඇමැති නඩත්තුවේ වියදම එළියට එයි . . .

රටේ ආර්ථිකය බිඳවැටී ජනතාවගේ ආහාර අහේනියක් ඇති වී තිබෙන සහ අධිඋද්දමනකාරී තත්වයක් පවතින අවස්ථාවේ අතිවිශාල වරප්‍රසාද ප්‍රමාණයක් ලබාගෙන රාජ්‍ය ඇමතිවරුන් පත්කිරීම පිළිබඳව අටවන ජනාධිපති රනිල් වික්‍රමසිංහ ජනතා විමුක්ති පෙරමුණේ දැඩි දෝශ දර්ෂණයට ලක්කරනු ලැබීය. එම පක්ෂයේ නායක අනුර කුමාර දිසානායක මෙම අදහස් දැක්වූයේ බත්තරමුල්ල පැලවත්ත පිහිටි ප්‍රධාන කාර්යාලයේදී මාධ්‍ය හමුවක් පවත්වමිනි. එහිදී ඔහු අවධාරණය කලේ ජනතාව මත අතිවිශාල බදු බරක් පටවා ඔවුන්ට කන් හැන්දෙන්වත් ප්‍රතිලාබ නොදී ඇමතිවරු බැකෝ යන්ත්‍ර වලින් බෙදාගන්නා බවය. එහිදී වැඩිදුරටත් පලකල අදහස් පහත දැක්වේ.

රනිල් වික්‍රමසිංහගේ ආණ්ඩුව රාජ්‍ය අමාත්‍ය ධුර 37 ක් පත්කර ඉතාමත් කෙටි කාලයක් ඇතුළත තවත් කැබිනට් අමාත්‍ය ධූරත් ලබාදීමට නියමිතයි. සාමාන්‍ය ජනතාවට තමන්ගේ ජීවිතය පවත්වාගෙන යන්න බැරි තරම් ආර්ථික අමාරුකම් තිබෙන අවස්ථාවක, පසුගිය මාස කිහිපය තුළ ඉන්ධන මිල හතර ගුණයකට වඩා වැඩි කර විදුලි ගාස්තු දෙගුණයකින් හෝ තුන් ගුණයකින් ඉහළ දමා තිබෙනවා. ජල ගාස්තුත් වැඩිකර අත්‍යවශ්‍ය ආහාරපාන මිල ගණන් විශාල වශයෙන් ඉහළ යවා තිබෙනවා. ජනතාව එදිනෙදා ගැටලු රාශියකට මුහුණ දී සිටිනවා. ආණ්ඩු ප්‍රමුඛතාවය දිය යුත්තේ ජනතාවගේ මේ ගැටලු විසඳන්නයි. නමුත් වර්තමාන ආණ්ඩුව උත්සාහ කරමින් තිබෙන්නේ ආණ්ඩුවේ අයගේ අභ්‍යන්තර ගැටලු විසඳා ගන්නයි. රනිල් වික්‍රමසිංහ තමන් තෝරා පත්කර ගන්න ඡන්දය දුන් 134 දෙනාගේ ගැටලු විසඳීමේ යෙදී සිටිනවා. තමන්ගේ ආච්චි සහ සීයා “ණයක් ගත්තොත් ගෙවන්න” යනුවෙන් උපදෙස් දී ඇති බව රනිල් වික්‍රමසිංහ පක්‍ෂ සමුළුවේදී ප්‍රකාශ කළා. රනිල් වික්‍රමසිංහගේ ජනාධිපති ධුරය බැසිල් රාජපක්‍ෂගෙන් ණයට ගත් එකක්. දැන් ඒ ණය පියවමින් පොහොට්ටුව නියෝජනය කරන මන්ත්‍රීවරු 29 කට රාජ්‍ය අමාත්‍ය ධුර ලබාදී තිබෙනවා. ශ්‍රී ලංකා නිදහස් පක්‍ෂය නියෝජනය කරන 06 ක් සහ සජබ නියෝජනය කරන දෙදෙනෙකුට රාජ්‍ය අමාත්‍ය ධුර ලබාදී බැසිල් රාජපක්‍ෂගේ ණය ගෙවමින් සිටිනවා. ඊට අමතරව තව කැබිනට් අමාත්‍ය ධුරත්, දිස්ත්‍රික් සම්බන්ධීකරණ කමිටුවල සභාපති ධුරත් ලබාදී තිබෙනවා.

රනිල් වික්‍රමසිංහ බැසිල්ගේ ණය ගෙවීමට පත්කරන රාජ්‍ය ඇමතිවරුන් වැටුප් ගන්නේ නැති බවට ප්‍රචාර ගෙනයනවා. ඔවුන්ට වැටුප අදාළම නැහැ. 2016 අප්‍රේල් මාසේ 19 වැනිදා රනිල් වික්‍රමසිංහගේ ආණ්ඩුව නිකුත් කළ චක්‍රලේඛයට අනුව ඇමතිවරුන්ට ලබාදී ඇති ප්‍රතිපාදන එලෙසින්ම රාජ්‍ය අමාත්‍යවරුන් සඳහාද වලංගු කර තිබෙනවා. රාජ්‍ය අමාත්‍යවරයෙකුට අහිමි එකම දේ කැබිනට් මණ්ඩලයට සහභාගි නොවීම පමණයි. අදාළ අමාත්‍යවරයා මගින් කැබිනට් පත්‍රිකාව ඉදිරිපත් කළ යුතුයි. රාජ්‍ය අමාත්‍යවරුන්ට නිල වශයෙන් වාහන 03ක් ලැබෙනවා. බස්නාහිර පළාත තුළ නම් පෙට්‍රල් වාහන එකක් සඳහා ලීටර් 600 ක් සහ බස්නාහිර පළාතෙන් පිට ලීටර් 750 ක් මසකට ලැබෙනවා. ඩීසල් වාහනයක් නම් බස්නාහිර පළාත තුළ ලීටර් 500 ක් සහ ඉන් පිට ලීටර් 600 ක් ලැබෙනවා. මෙවැනි වාහන 03 ක් සඳහා පෙට්‍රල් ලීටර් 2,250 ක් ලැබෙනවා. පවුලක් ජීවත් කරවන ත්‍රී වීල් එකකට දෙන්නේ ලීටර් 05 යි. රාජ්‍ය ඇමතිවරුන්ට පෙට්‍රල් ලීටරයක් රු. 450 බැගින් රුපියල් 1,0125,00/= ක් මාසයකට තෙල් සඳහා ලැබෙනවා. ඩීසල් වාහනයක් නම් ලීටර් 1,800 ක් ලැබෙනවා. රු. 430/= බැගින් රු. 778,000/= ක් ලැබෙනවා. එක් රාජ්‍ය අමාත්‍යවරයෙකුට තෙල් සඳහා විශාල වරප්‍රසාදයක් හිමි වෙනවා.

ඒ වගේම ඇමතිවරයෙකුට දුරකතන කාර්යාලයට දෙකක්, නිවාසයට දෙකක් සහ ජංගම දුරකතනයක් ලැබෙනවා. කාර්යාලයේ දුරකතන දෙක වෙනුවෙන් රු. 20,000/= ක් රාජකාරී නිවාස දුරකතනයය වෙනුවෙන් රු. 10,000/= ක් සහ ජංගම දුරකතතනයට රු. 10,000/= ක් වශයෙන් රු. 40,000/= ක් ලබාදෙනවා. මේ මුදල් ලබාදෙන්නේ මාසික ස්ථාවර ගාස්තුවලට සහ බදු මුදලට අමතරවයි. ඉන්ධන සඳහාත් මිල ඉහළ යන විට මාසික දීමනාවක් ලෙස ගණනය කරනවා. අදාළ මාසයේ පළමුවැනි දින දේශීය වෙළඳපොළේ පවතින මිල ගණන්වලට අනුවයි එම ගණනය කරන්නේ. ඉන්ධන මිල ඉහළ යාමට සමාන්තරව ඇමතිවරුන්ට ලැබෙන ගාණ වැඩිවෙනවා. ඒ මුදල් අතට ලැබෙනවා. ඊට අමතරව නිවාස සහ අනෙකුත් සියලුම පහසුකම් මහජන මුදලින් ලබා දෙනවා. ඒ ගොල්ලෝ බුදිය ගන්නෙත්, කන්නෙ බොන්නෙත් මහජන මුදල්වලින්. ඒ නිවාසවලට අදාළ හැඳි ගෑරුප්පු පවා මහජන මුදලින් ලබා දෙනවා. ගෙයක් ලබාගන්න බැරිවෙන ඇමතිවරුන්ට පැරණි චක්‍රලේඛ අනුව රු. 100,000/= දීමනාවක් ලබා දෙනවා.

ඇමති කාර්ය මණ්ඩලයට 15 දෙනෙක් ලබා දෙනවා. පෞද්ගලික ලේකම්, සම්බන්ධීකරණ ලේකම්වරු දෙදෙනෙක්, මාධ්‍ය ලේකම්වරයෙක්, මහජන සම්බන්ධතා නිලධාරීවරයෙක්, පෞද්ගලික සහකාර මහජන සම්බන්ධතා නිලධාරීන් පහක්, කාර්යාල සහායක දෙදෙනෙක්, රියදුරු දෙදෙනෙක්.. ආදී වශයෙන් 15 ක් ලැබෙනවා. ඔවුන්ගෙන් පස් දෙනෙකුට මහජන මුදලින් බිල් ගෙවන දුරකතන ලැබෙනවා. රු. 5,000/= සිට 6,000/= දක්වා බිල් ඔවුන් වෙනුවෙන් ගෙවනවා. ස්ථාවර ගාස්තු සහ රජයේ බදු ඉවත් කර ලබාදෙන මුදල මේක. ආරක්‍ෂාව වෙනුවෙන් ඇමතිවරයෙකු හට පොලිස් නිලධාරීන් 08 ක් ලබා දෙනවා. මන්ත්‍රීවරුන්ට පොලිස් නිලධාරීන් දෙදෙනෙක් ලබා දෙනවා. අපිනම් ආරක්‍ෂාවට පොලිස් නිලධාරීන් ලබාගෙන නැහැ. ඉන්ධන සමග පසු ගමන් ආරක්‍ෂක රථයක් ඇමතිවරයෙකට ලබා දෙනවා. රාජ්‍ය අමාත්‍ය ධුර වෙනුවෙන් ලබාදෙන අමාත්‍යාංශ කාර්යාලවලට කුලිය ගෙවන්න ඕනෑ. අමාත්‍යාංශ ලේකම් ඇතුළු ඉහළ නිලධාරීන්ට වාහන ඉන්ධන දුරකතන ඇතුළු වරප්‍රසාද ලබා දෙනවා. අතිරේක ලේකම්වරුන්ටත් ඒ වගෙයි. රාජ්‍ය අමාත්‍ය ධුරයක් නඩත්තු කරන්න යන වියදම අපේ රටේ ජනපදයක් නඩත්තු කරන්න යන වියදමක් වගෙයි. අපේ රටේ පුරවැසියන් මෙවැනි බරක් දරන්න ඕනෑද? අනෙක් පැත්තෙන් ජනතාවට 15% ක වැට් බදු, 2.5% බැගින් වැල් පොලී එකතු වන තව බදුත් පටවනවා. ජනතාවගේ ධනයෙන් පරපුටු රැලක් නඩත්තු වෙනවා. මහජනතාවට කන් හැන්දෙන්වත් නොදී ඇමතිවරුන්ට බැකෝවලින් බෙදා ගන්නවා. මේ වැනි වැය බරක් ජනතාව තවදුරටත් දැරිය යුතුද?

අපේ රට ආර්ථික ප්‍රපාතයට හෙළුවේ මේ දේශපාලන සංස්කෘතියයි. මුදල් ඇමති රනිල් වික්‍රමසිංහගේ අතේ හැන්ද තියෙන්නේ. ඒ වගේම අටවා ගත් ජනාධිපති. අමාත්‍යවරු, නියෝජ්‍ය අමාත්‍යවරු සිතු සේ පත් කරමින් භාණ්ඩාගාරයේ ධනය බැකෝවලින් බෙදා ගනිමින් ජනතාවට කන් හැන්දෙන්වත් ලබා දෙන්නේ නැහැ. මෙවැනි විශාල ආර්ථික අර්බුදයක් තිබෙන අවස්ථාවක නාස්තිකාර ඇමති ධුර ඕනෑද? ජනතාවගේ ප්‍රශ්නය ඇමතිවරු, රාජ්‍ය ඇමතිවරු, නැතිකමද? ජනතාවට තියෙන්නේ ආහාර හිඟයත් මිල ඉහළ යාමත් පිළිබඳ ප්‍රශ්න. රටට තියෙන්නේ ඩොලර් නැතිකමේ ප්‍රශ්නය. භාණ්ඩාගාරයට මුදල් නැතිකම. මේ හැම එකක්ම පැත්තක තියලා ඒ ගොල්ලන්ගේ ප්‍රශ්න විසඳා ගන්න අතර රනිල් වික්‍රමසිංහ වේදිකාවට ඇවිත් කියන්නේ රාජ්‍ය සේවය අඩු කරන්න, වියදම් අඩු කරන්න ඕනෑ කියලයි. ඒ අයට උපරිමයෙන් බෙදා ගන්න ගමන් ජනතාව අන්ත පීඩනයකට පත් කරනවා. මේ දේශපාලන සංස්කෘතිය වෙනස් කරන්න ඕනෑ. ඒ වෙනස් කිරීම සඳහා ජනතාව පෙළගැහෙන්න ඕනෑ. නාස්තිකාරී, විගඩම්කාරී සහ පිනට ලැබුණු වස්තුව වියදම් කරනවා වගේ යැපෙන දේශපාලන සංස්කෘතිය වෙනස් කළ යුතුයි.

මේ සඳහා තවත් අත්දැකීම් අවශ්‍ය නැහැ. මේ පාලකයන් ඇති තරම් අපට අත්දැකීම් දීලා තියෙනවා. කරුණු දීලා තිබෙනවා. ඔවුන් මොන වගේ කණ්ඩායමක්ද කියලා ඔප්පු කර තිබෙනවා. ජනතාවගේ මුදල්වලින් යැපෙන මොන තරම් පරපුටු කණ්ඩායමක්ද කියලා ඔප්පු කර තිබෙනවා. ඒ නිසා මේ දේශපාාලන සංස්කෘතිය වෙනස් කිරීම සඳහා පෙළගැසෙන්න කියලා ජනතාවට අපි ආරාධනා කරනවා.

Subscribe
Notify of
0 Comments
Inline Feedbacks
View all comments

Next Post

තුන්වන චාල්ස් රජු ප්රථම වරට ජාතිය අමතයි . . .

Sat Sep 10 , 2022
තුන්වන චාල්ස් රජු ප්‍රථම වරට ජාතිය ඇමතීය. ලන්ඩනයේ ශාන්ත පාවුළු ආසන දෙව් මැදුරේදී පළමුවරට චාල්ස් රජු ජනතාව ඇමතීම සිදුකළ අතර ඒ සඳහා ජ්‍යෙෂ්ඨ දේශපාලකයින් මෙන්ම 2,000 කට අධික ජනතාවක් සහභාගී වී ඇති බව වාර්තා වේ. එහිදී “ගෝඩ් සේව් ද කිං“ ලෙස වෙනස් කෙරුණු එංගලන්ත ජාතික ගීය ප්‍රථම වරට වාදනය කිරීම ද එහිදී […]

හැඳින්වීම

” ජනමිණ ”

සිහනෙත් මාධ්‍ය ජාලයට අයත් වෙබ් අවකාශයකි. මෙම වෙබ් අවකාශය හරහා ප්‍රවෘත්ති හා විශේෂාංග තුලනාත්මක හා අරුත්බර මුහුණුවරකින් ඔබ වෙත රැගෙන ඒම අපේ අභිප්‍රායයි. ” ජනමිණ ” පාඨක ජනවින්‍යාසය වෙත නැවුම් පරිකල්පනයන් විවර කරන හරවත් නිර්මාණාත්මක ලේඛනයෙන් පොහොණි ය.

0
Would love your thoughts, please comment.x
()
x