මොරටුව අඟුලානේ උත්සව ශාලාවක පැවැති මංගල උත්සවයක් අතර තුර බාලවයස්කාර මනමාලිය සහ තරුණ මනමාලයා උත්සවය අතරතුර උඩරට මංගල ඇඳුම් පිටින් අත්අඩංගුවට ගත් බව අඟුලාන පොලිසිය පවසයි.
ජාතික ළමා ආරක්ෂණ අධිකාරියෙන් 1929 හදිසි ඇමතුම් අංකයට ලැබුණු තොරතුරකට අනුව මෙම අත්අඩංගුවට ගැනීම සිදු කළ බව පොලිසිය පැවසීය. විවාපත් වීමට ගිය මනාලියගේ වයස අවුරුදු 15 යි මාස 6 ක් බව සඳහන් කරන පොලිසිය සැකකාර තරුණයාගේ වයස අවුරුදු 19 බවත් මූලික විමර්ශනයේදී හෙළි වු බව පොලිසිය පැවසීය.
මේ වන විට තරුණයා පොලිස් අත්අඩංගුවේ පසුවන බව සඳහන් කළ පොලිසිය බාල වයස්කාර දැරිය දකුණු කොළඹ ශික්ෂණ රෝහලේ වෛද්ය පරීක්ෂණයක් සඳහා යොමු කර ඇති බව ද පොලීසිය පැවසීය.
- රේඛා තරංගනී ෆොන්සේකා