අපවත්වී වදාළ අනුරාධපුර අටමස්ථානාධිපති උතුරු මධ්‍යම දිසාවේ ප්‍රධාන සංඝ නායක ආචාර්ය අතිපූජ්‍ය පල්ලේගම සිරිනිවාස නාහිමිපාණන්ගේ ශ්‍රී දේහය පිළිබඳ අවසන් කටයුතු පූර්ණ රාජ්‍ය අනුග්‍රහය යටතේ සිදු කිරීමට ජනාධිපති රනිල් වික්‍රමසිංහ මහතා උපදෙස් දී තිබෙනවා. එම කටයුතු සම්බන්ධීකරණය සඳහා බුද්ධ ශාසන අමාත්‍ය විදුර වික්‍රමනායක සහ උතුරු මැද පළාත් ආණ්ඩුකාර මහීපාල හේරත් ප්‍රධානත්වයෙන් කමිටුවක් පත් කිරීමට ජනාධිපතිවරයා පියවර ගනු ලැබීය.
මෙරට මහා සංඝරත්නය අතුරින් ප්‍රමුඛ කාර්යභාරයක් ඉටු කරමින් සිය පැවිදි දිවිය අර්ථවත්ව ගත කළ අතිපූජ්‍ය පල්ලේගම සිරිනිවාස නා හිමිපාණන් වහන්සේ රජරට ජනතාවගේ මෙන්ම රටවැසි සියලු ජනතාවගේ සුබ සෙත උදෙසා නිරන්තරයෙන් කැප වූ සංඝ පිතෘන් වහන්සේ නමකි.
අපවත් වී වදාළ අටමස්ථානාධිපති පල්ලේගම සිරිනිවාස නාහිමිපාණන් වහන්සේගේ දේහය අද පස්වරු 5 ට පමණ අනුරාධපුරයේ මහාවිහාර සන්නිපාත ශාලාවේ තැන්පත් කිරීමට නියමිතයි. මහජන ගෞරවය සඳහා එහිදී ඉඩ සලසා තිබේ
දේහය පිළිබඳ ආදාහන පූජෝත්සවය සෙනසුරාදා පස්වරුවේ සිදුකිරීමට නියමිතයි. මේ සඳහා පූර්ණ රාජ්‍ය ගෞරව ලබා දෙන අතර රජයේ කිසිදු මුදලක් මේ සඳහා භාවිතා නොකිරීමටත් එම මුදල් දායක සභාවෙන් යොදා ගැනීමටත් අටමස්ථාන විහාර අධිපතිවරුන් සහ දායක සභාව තීරණය කර තිබේ.
Janamina Sri Lanka Rupee Exchange Rate