පිලිපීනයේ මගී යාත්‍රාවක් ගිනි ගනී . . .

දකුණු පිලිපීනයේ මගීන් රැගෙන යමින් සිටි යාත්‍රාවක ඇති වූ ගින්නකින් 31 දෙනෙකු දියේ ගිලී හෝ ගින්නට හසු වී ජීවිතක්ෂයට පත් වී ඇතැයි විදෙස් මාධ්‍ය වාර්තා කරයි. එම වාර්තා පෙන්වා දුන්නේ, අදාළ යාත්‍රාවේ ගමන් කරමින් සිටි පිරිසෙන් 230 දෙනෙකු මුදා ගෙන ඇති බව ය.

Lady Mary Joy 3 නමැති එම මගී යාත්‍රාව මින්දනාඕ දූපතේ සැම්බෝන්ගා නගරයේ සිට සුලු පළාතේ ජොලෝ දූපත දක්වා ගමන් කරමින් සිටියදී බදාදා (මාර්තු 29) රාත්‍රියේදී ගින්න හටගෙන තිබේ. පිලිපීන වෙරළාරක්ෂක බළකාය සහ ධීවරයින් ඇතුළු ගැලවුම්කරුවන් විසින් මගීන් 195 දෙනෙකු සහ කාර්ය මණ්ඩලයේ 35 දෙනෙකු මුදා ගනු ලැබ ඇත.

මිය ගිය පිරිස අතර මාස 6ක දරුවෙකු ඇතුළුව අවම වශයෙන් දරුවන් තිදෙනෙකු සිටින බව විදෙස් මාධ්‍ය වාර්තා කර තිබේ. බලධාරීන් සඳහන් කර ඇත්තේ, 14 දෙනෙකු තුවාල ලබා ඇති බව ත් 7 දෙනෙකු අතුරුදන් වී ඇති බව ත් ය.

මගී නම් ලැයිස්තුවේ සටහන් 205 දෙනාට අමතරව තවත් මගීන් යාත්‍රාවේ ගමන් කරමින් සිට ඇති අතර ඒ හේතුවෙන් අතුරුදන් පුද්ගලයින් සංඛ්‍යාව තවදුරටත් ඉහළ යා හැකි බව බලධාරීන් ප්‍රකාශ කර ඇත.

විදෙස් මාධ්‍ය වාර්තා කර ඇත්තේ, ගින්න ඇති වූ ආකාරය තවමත් අපැහැදිලි බව ය.

• Tharaka Samman