දකුණු ගැඹුරු මුහුදේ සිට යාත්‍රාවකින් ප්‍රවාහනය කරමින් තිබූ හෙරොයින් තොගයක් ශ්‍රී ලංකා නාවික හමුදාව විසින් ඊයේ (මැයි 18) අත්අඩංගුවට ගනු ලැබ තිබේ. හෙරොයින් මත්ද්‍රව්‍ය කිලෝග්‍රෑම් 120කට වැඩි ප්‍රමාණයක් මෙම යාත්‍රාව තුළ තිබී ඇති බව කියන නාවික හමුදාව එහි වටිනාකම රුපියල් කෝටි 120කට අධික බව පවසයි.
එම මත්ද්‍රව්‍ය තොගය ප්‍රවාහනය කරමින් සිටි මෙරට පුද්ගලයන් 6 දෙනෙකු ද ඔවුන් හෙරොයින් ප්‍රවාහනය කරමින් සිටි බහුදින යාත්‍රා වද නාවික හමුදාව භාරයට ගෙන තිබේ. රාජ්‍ය බුද්ධි සේවාවට ලද තොරතුරක් මත ඒකාබද්ධව මෙම වැටලීම සිදු කර ඇතැයි වාර්තා වේ.
ශ්‍රී ලංකාවට දකුණු දෙසින් ගැඹුරු මුහුදේ කරන ලද විශේෂ සෝදිසි මෙහෙයුමකින් අනතුරුව සැක සහිත යාත්‍රාව නිලධාරීන් විසින් හඳුනා ගනු ලැබ එය සෝදිසියට ලක්කර ඇත. නාවික හමුදාවේ විජයබාහු නෞකාව මගින් මෙම මෙහෙයුම සිදු කර ඇති අතර පසුව අල්ලා ගත් හෙරොයින් තොගය සහ සැකකරුවන් කොළඹ වරායට ඊයේ දහවල් රැගෙන විත් ඇත.
නාවික හමුදාපති වයිස් අද්මිරාල් ප්‍රියන්ත පෙරේරා අත්අඩංගුවට ගත් මත්ද්‍රව්‍ය තොගය නිරීක්ෂණය කිරීමට එක්ව සිටියේ ය.
Janamina Sri Lanka Rupee Exchange Rate