දේශීය ණය ප්‍රතිව්‍යුහගත කිරීමේදී සේවක අර්ථසාධක අරමුදලට බලපෑමක් ඇති නොවන පරිදි එම අරමුදලට සියයට නවයක අවම පොලී අනුපාතයක් ලැබෙන නීතියක් පාර්ලිමේන්තුවේ සම්මත කර ගැනීමට කටයුතු කරන බව කම්කරු හා විදේශ රැකියා ඇමැති මනුෂ නානායක්කාර පැවසීය.
එසේ සේවක අර්ථසාධක අරමුදල සඳහා සියයට නවයක අවම පොලී අනුපාතයක් ලබාදීම ස්ථිර කිරීම සඳහා නීති ගෙන එන ලෙස ජනාධිපති රනිල් වික්‍රමසිංහ විසින් ඇමැතිවරයාට උපදෙස් ලබාදී ඇත.
මේ අනුව ඉදිරි වසර තුන සඳහා සේවක අර්ථසාධක අරමුදලට සියයට නවයක අවම පොලී අනුපාතයක් ලබාදීම තහවුරු කිරීම සඳහා සේවක අර්ථසාධක අරමුදල් පනත සංශෝධනය කිරීමට කටයුතු කරන බව ඇමැතිවරයා සඳහන් කළේය.
දේශීය ණය ප්‍රතිව්‍යූහගත කිරීම සේවක අර්ථසාධක අරමුදලට බලපාන ආකාරය සම්බන්ධයෙන් ජනාධිපතිවරයා සහ වෘත්තිය සමිති නියෝජිතයන් අතර සාකච්ඡාවක් ජනාධිපති ලේකම් කාර්යාලයේදී පැවැති අතර සේවක අර්ථ සාධක අරමුදලට සියයට නවයක අවම පොලී අනුපාතයක් ලබාදීමට කටයුතු කරන බව ජනාධිපතිවරයා සහතික වී ඇත.
ඒ අනුව සේවක අර්ථසාධක පනත් කෙටුම්පතට සංශෝධනයක් ගෙන ඒම සඳහා කැබිනට් අනුමැතිය කඩිනමින් ලබාගෙන එය පාර්ලිමේන්තුවට ඉදිරිපත් කර සම්මත කර ගැනීමට කටයුතු කරන බවද ඇමැතිවරයා කීවේය.
- සාලිය කුමාර ගුණසේකර
Janamina Sri Lanka Rupee Exchange Rate