අලුත් දුම්රිය මාර්ගයකින් ඉන්දියාව සහ බංග්ලාදේශය යාවෙයි . . .

බංග්ලාදේශ අගමැතිනි ෂීක් හසීනා විසින් සැප්තැම්බර් මාසයේදී අගමැති නරේන්ද්‍ර මෝදි සමඟින් Akhaura-Agartala දුම්රිය මාර්ගය විවෘත කිරීමට අපේක්ෂා කෙරේ. 

මෙම ව්‍යාපෘතිය දෙරටේ පුරවැසියන් අතර සැලකිය යුතු ප්‍රබෝධයක් ඇති කරන අතර, එය ඉන්දියාව සහ බංග්ලාදේශය යන රටවල් දෙකටම වාසිසහගත වනු ඇතැයි පැවසේ.

බංගලාදේශයේ චිතගොං සහ මොන්ග්ලා වරායන් භාවිතා කරමින් ඉන්දියාවේ අනෙකුත් වරායවලින් අගර්තාලා හරහා ඊසානදිග කලාපයේ ප්‍රාන්තවලට මෙමගින් භාණ්ඩ ප්‍රවාහනය කළ හැක.

මෙය වෙළඳාම වැඩි කිරීමට සහ වේගවත් හා ලාභදායී භාණ්ඩ ප්‍රවාහනයට පහසුකම් සැලසීමට උපකාරී වන බව වාර්තා සඳහන් කරයි.

ඉන්දීය ණය ආධාර මත ක්‍රියාත්මක කරන ලද ව්‍යාපෘතියේ ඉදිකිරීම් සියයට 90 කට වැඩි ප්‍රමාණයක් අවසන් කර ඇත.

ඉන්දියාවේ කිලෝමීටර් 5.05 ක් සහ බංග්ලාදේශයේ කිලෝමීටර් 10.014 ක් දිග කිලෝමීටර් 15.064 ක් විහිදෙන මෙම දුම්රිය මාර්ගය, අගර්තාලා බංග්ලාදේශයේ අඛෞරා සම්බන්ධ කරයි.

ක්‍රියාත්මක වූ පසු, දුම්රිය අගර්තාලා සහ කොල්කටා අතර ගමන් කාලය පැය 31 සිට පැය 10 දක්වා අඩු කරනු ඇත.

මෙමගින් වෙළඳාම, සංචාරක සහ සංස්කෘතික හුවමාරුව සඳහාද අවස්ථා විවෘත කරනු ඇතැයි අපේක්ෂා කෙරේ.