ගෝඨාභය රාජපක්ෂ ගේ පෞද්ගලික ලේකම්වරයා ලෙස කටයුතු කළ සුගීශ්වර බණ්ඩාර එම ධූරයෙන් අද (20) ඉල්ලා අස්විය.
තනතුරින් ඉල්ලා අස්වීමේ ලිපිය බණ්ඩාර මහතා ගෝඨාභය රාජපක්ෂ ට අද (20) යවා ඇත.
ගෝඨාභය රාජපක්ෂ ජනාධිපති ධුරයේ කටයුතු කළ සමයේදී ඔහුගේ පෞද්ගලික ලේකම්වරයා වශයෙන් කටයුතු කළේද සුගීස්වර බණ්ඩාර ය.
තමා ගෝඨාභය රාජපක්ෂ යටතේ සේවය කිරීමට ප්රිය වුවත් නොවැළැක්විය හැකි කාරණා හේතුවෙන් සහ ඔහුට දක්වන ගෞරවයක් ලෙස පෞද්ගලික ලේකම් තනතුරෙන් ඉල්ලා අස්වීමට මෙසේ තීරණය කළ බව බණ්ඩාර හිටපු ජනාධිපතිවරයාට යැවූ ලිපියේ සඳහන් වේ.
තමාගේ එකම අරමුණ මවුබිම සහ එහි වෙසෙන සහෝදර ජනතාව වෙනුවෙන් සේවය කිරීම බව පවසන හෙතෙම අපරාජිත රටක් බිහිකිරීම වෙනුවෙන් නව දේශපාලන වැඩපිළිවෙලක් සමග එක්වීමට කටයුතු කරන බවද සඳහන් කරයි.
මව්බිම යළි අපරාජිතව අභිමානයෙන් ගොඩනැගීමට හැකි කණ්ඩායමක් සමග වැඩ කිරීමට තමා නොපැකිලෙන බවද ඔහු මෙම ලිපියෙන් ප්රකාශ කරයි.
- සුජිත් හේවාජුලිගේ