ආණ්ඩුවේ කොන්ත්‍රාත් නවතී . . .

අමාත්‍යාංශ විසින් ක්‍රියාත්මක කරන මහා පරිමාණ ව්‍යාපෘතිවල අත්හිටුවූ කොන්ත්‍රාත් සඳහා අලාභය ලෙස රුපියල් මිලියන දෙදහස් තුන්සිය හැත්තෑහතරක (2,374) ක වන්දි මුදලක් කොන්ත්‍රාත්කරුවන් විසින් ඉල්ලා ඇතැයි අනාවරණය වෙයි.

කොන්ත්‍රාත් 302ක් විවිධ හේතුමත අත්හිටුවා ඇත. ඉන් කොන්ත්‍රාත් 09ක් අත්හිටුවීමේ අලාභය ලෙස කොන්ත්‍රාත්කරුවන් විසින් ඉහත මුදල ඉල්ලා තිබේ.

මීට අමතරව තවත් කොන්ත්‍රාත් 22 කට අදාළව වන්දි ඉල්ලීමේ සම්භාවිතාවක් පවතින බවට ද තොරතුරු ලැබී තිබේ.

අත්හිටවූ කොන්ත්‍රාත් අතර කොන්ත්‍රාත්කරු විසින් තාවකාලිකව අත්හිටුවූ කොන්ත්‍රාත් 131 ක් ඇත. ඊට අමතරව අමාත්‍යාංශ විසින් කොන්ත්‍රාත් 10 ක් හා අනෝන්‍ය එකඟතාව මත කොන්ත්‍රාත් 02 ක්ද අත්හිටුවා ඇත.

ඉකුත් (2023) වසරේදී මහා පරිමාණ සංවර්ධන ව්‍යාපෘති 33 ක කටයුතු අවසන් කර ඇති අතර තවත් ව්‍යාපෘති 20 ක කටයුතු අත්හිටුවා තිබේ. ණය දෙන විදේශීය පාර්ශ්ව විසින් ණය මුදල් නිදහස් නොකිරීම නිසා ව්‍යාපෘති 33 ක කටයුතු මන්දගාමී තත්ත්වයට පත්ව ඇතැයිද අනාවරණය වේ.

තෙවන පාර්ශ්වීය අනුමැතීන් ලැබීම ප්‍රමාදවීම, ඉඩම් අත්පත් කර ගැනීම ප්‍රමාදවීම, කොන්ත්‍රාත්කරුවන්ගේ ඌන කාර්යසාධනය, ඉදිකිරීම් අමුද්‍රව්‍ය මිල ඉහළ යාම, ප්‍රසම්පාදන ගැටලු, විෂයපථය වෙනස්වීම සහ විදේශ ණය වාරික නිදහස් කිරීම අත්හිටුවීම වැනි කාරණා මහා පරිමාණ කොන්ත්‍රාත් කටයුතු අඩාළවීමට බලපා තිබේ.

මහා පරිමාණ ව්‍යාපෘති අතුරින් සියයට හතළිහක (40%) ව්‍යාපෘති කාලය ඉක්මවා ගොස් තිබේ.ඒවායේ කාලය දිගුකරගෙන නොමැති අතර, ඇතැම් ව්‍යාපෘතිවල කාලයෙන් අඩක් ඉක්මවා ගොස් ඇත. ඉන් සියයට විසිපහක්වත් (25%) වත් නිමකර නැතැයිද ජනාධිපතිවරයා මුදල් ඇමැතිවරයා ලෙස කැබිනට් මණ්ඩලයට ඉදිරිපත් කරන ලද කැබිනට් පත්‍රිකාවක සඳහන් වේ.

• සාලිය කුමාර ගුණසේකර