මහජන උපයෝගීතා කොමිසමේ හිටපු සභාපති ජනක රත්නායක ඇතුළු පිරිසක් ගොනුකර තිබෙන මූලික අයිතිවාසිකම් පෙත්සම්, විභාගයට නොගෙන නිෂ්ප්රභ කරන ලෙස නීතිපතිවරයා ශ්රේෂ්ඨාධිකරණය හමුවේ මූලික විරෝධතා මතු කර තිබේ.
මෑතකදී ලංකා විදුලි බල මණ්ඩලය ක්රියාත්මක කළ විදුලි ගාස්තු සංශෝධනය කිරීමේ තීරණය බලරහිත කිරීමේ නියෝගයක් නිකුත් කරන ලෙස ඉල්ලා මෙම පෙත්සම් ගොනු කර තිබුණි.
මෙම පෙත්සම් අද (19) ප්රීති පද්මන් සූරසේන, ජනක් ද සිල්වා සහ මහින්ද සමයවර්ධන ගෙන් සමන්විත ත්රිපුද්ගල ශ්රේෂ්ඨාධිකරණ විනිසුරු මඩුල්ල ඉදිරියේ කැඳවනු ලැබීය.
එහිදී නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් විවේකා සිරිවර්ධන මහත්මිය අධිකරණය හමුවේ කරුණු දක්වමින් මෙම පෙත්සම්වල වගඋත්තරකරුවන් ලෙස අමාත්ය මණ්ඩලයේ සාමාජිකයන් නම්කර නොමැති බව සඳහන් කළාය.
එමෙන්ම එහි වගඋත්තරකරුවකු ලෙස බලශක්ති විෂය භාර අමාත්යවරයාව නම්කර නොමැති බවත් ඇය පෙන්වා දුන්නාය.