සහල් සහ සීනි සඳහා පාලන මිලක් නියම කිරීමට රජය කටයුතු කිරීම හේතුවෙන් වෙළෙඳපොළේ මේ වන විට සීනි සහ සම්බා සහල් හිඟයක් නිර්මාණය වී ඇති බවට පාරිභෝගිකයෝ චෝදනා කරති.
ආනයනික සීනි කිලෝග්රෑමයක් සඳහා ශත 25ක්ව පැවති විශේෂ වෙළෙඳ භාණ්ඩ බද්ද රුපියල් 50ක් දක්වා ඉහළ දැමීම ත් සමග බොහෝ වෙළෙඳුන් සීනි මිල ඉහළ දැමූ අතර එය පාලනය සඳහා උපරිම සිල්ලර මිලක් පැනවීමට රජයට සිදු විය.
ඒ අනුව, සුදු සීනි කිලෝග්රෑමයක් සඳහා රුපියල් 275ක් සහ දුඹුරු සීනි කිලෝග්රෑම් එකක් සඳහා රු. 330ක් ලෙසින් උපරිම සිල්ලර මිලක් නියම කර ඇත.
වෙළෙඳපොළේ පවතින සීනි හිඟයට අමතරව මේ වන විට සම්බා සහ කිරි සම්බා සහල් හිඟයක්ද නිර්මාණය වී තිබේ.
කෙසේ වෙතත්, පනවා ඇති පාලන මිලෙන් බැහැරව සීනි සහ සහල් අලෙවි කරන පුද්ගලයන් සොයා කරන වැටලීම් අඛණ්ඩව ක්රියාත්මක කරන බව පාරිභෝගික කටයුතු පිළිබඳ අධිකාරිය නිවේදනය කර ඇත.
මේ සම්බන්ධයෙන් අදහස් දක්වමින් මුදල් රාජ්ය අමාත්ය රංජිත් සියඹලාපිටිය සඳහන් කළේ, බදු ඉහළ නැංවීමට පෙර ආනයනය කළ සීනි මෙටි්රක් ටොන් 19,000ක් තවමත් රට තුළ පවතින අතර එබැවින් සීනි හිඟයක් හෝ අනවශ්ය මිල ඉහළ යෑමක් සිදු වීමට කිසිදු අවස්ථාවක් නොමැති බව ය.
පාලන මිලට වැඩියෙන් සීනි අලෙවි කරන ස්ථාන සොයා මෙහෙයුම් ක්රියාත්මක කරන ලෙස පාරිභෝගික සේවා අධිකාරියට උපදෙස් දී ඇති බව ද ඔහු සඳහන් කළේ ය.
නියමිත මිලට සීනි මිලදී ගැනීම සහ අනවශ්ය සීනි හිඟයක් නිර්මාණය වීම වැළැක්වීම රජයේ පමණක් නොව ජනතාවගේ ද වගකීම බව ත් එවැනි අවස්ථාවලදී පාරිභෝගික සේවා අධිකාරිය දැනුවත් කිරීම ජනතාවගේ යුතුකම බව ත් ඔහු වැඩිදුරට ත් සඳහන් කළේ ය.
– Mawbima