පාර්ලිමේන්තු මන්ත්රී රාජිත සේනාරත්න ධීවර අමාත්යවරයා වශයෙන් කටයුතු කළ සමයේ නැව් 08 ක් මෙරටට ගෙන්වීම සහ මෝදර ධීවර වරාය බදුදීම අවස්ථාවලදී සිදු කර ඇති මූල්ය අක්රමිකා සම්බන්ධයෙන් වන නඩුව ඉල්ලා අස්කර ගන්නා බව අපරාධ පරික්ෂණ දෙපාර්ත්මේන්තුව කොළඹ මහේස්ත්රාත් අධිකරණයට දැනුම්දී ඇතිබව අතිරේක මහේස්ත්රාත් කේමින්ද පෙරේරා අද (26) දැනුම් දී ඇත.
අපරාධ පරීක්ෂණ දෙපාර්තමේන්තුව අධිකරණයට එලෙස දැනුම් දී ඇත්තේ මෙම සිද්ධියට අදාළව ‘දූෂණය’ චෝදනාව යටතේ අල්ලස් කොමිසම පාර්ලිමේන්තු මන්ත්රි රාජිත සේනාරත්නට එරෙහිව නඩුවක් ගොනුකර කටයුතු කර ඇති බැවින් මෙම අධිකරණයේ පවතින නඩුව ඉල්ලා අස්කර ගන්නා බවය. ඒ අනුව, එම නඩුව ඉල්ලා අස්කර ගැනීමට මහේස්ත්රාත්වරයා අපරාධ පරීක්ෂණ දෙපාර්තමේන්තුවට අවසර ලබා දී ඇත.
හිටපු ධීවර අමාත්ය රාජිත සේනාරත්නගේ සම්බන්ධීකරණ ලේකම්වරයකු ලෙස කටයුතු කළ දොන් ලලිත් අනුරාධ සෙනෙවිරත්න යන අය නමින් මෙම නැව් 8 චීන සමාගමක් සමඟ ගිවිසුමකින් මෙරටට ගෙන්වා ඇතැයි සදහන් කරමින් මෙම සිද්ධිය සම්බන්ධයෙන් අපරාධ පරික්ෂණ දෙපාර්තමේන්තුවට පැමිණීල්ලක් ඉදිරිපත් කර තිබුණේ රාජ්ය අමාත්ය සනත් නිශාන්ත පෙරේරා මහතා විසිනි. එමෙන්ම, අසාදුලේඛනයේ සදහන් විදෙස් සමාගමකට මෝදර වරාය බදුදී තිබීම සම්බන්ධයෙන්ද පරීක්ෂණයක් අරම්භ කරන ලෙසට පැමිණීල්ල අපරාධ පරීක්ෂණ දෙපාර්තමේන්තුවෙන් ඉල්ලා ඇතැයි අධිකරණයට කරුණු වාර්තා වී ඇත.