යුක්තිය මෙහෙයුම යටතේ කරන ලද සෝදිසියකදී ආයුර්වේද ඖෂධ වෙළඳසැලක මුවාවෙන් මාවතගම නගරයට පැමිණෙන පාසල් සිසුන් සහ උපකාරක පන්ති සඳහා පැමිණෙන සිසුන් ඉලක්ක කර ගනිමින් මහා පරිමාණයෙන් පවත්වාගෙන ගිය ගංජා මිශ්ර මදනමෝදකය විකිණීමේ ජාවාරමක් අත්අඩංගුවට ගත් බව මාවතගම පොලීසිය පවසයි.
මාවතගම පොලීසියේ බුද්ධි අංශ නිලධාරීන්ට ලද තොරතුරකට අනුව මාවතගම නගරයේ සිදු කරන ලද හදිසි සෝදිසියකදී මෙම ජාවාරම අනාවරණය කර ගැනීමට හැකිවී තිබේ. මෙම වෙළඳසැල තුළ පාසල් සිසුන් නිතරම ගැවසෙන බවට බුද්ධි අංශ නිලධාරීන්ට තොරතුරු ලැබී තිබී ඇත.
බුද්ධි අංශ නිලධාරියෙකු උපාය දූතයෙකු ලෙස යොදවා මදනමෝදකය මිළදී ගැනීමට යන මුවාවෙන් ගොස් මෙම වැටලීම සිදු කර තිබේ. එහිදී වෙළඳසැලේ ස්ථාන කීපයකම සඟවා තිබූ ගංජා මිශ්ර බවට සැක කරන මදනමෝදකය ගුලි සහිත පැකැට් 1875 ක් සමඟ එහි හිමිකරු සැකපිට අත්අඩංගුවට ගත් බවද පොලීසිය සඳහන් කළේය.
ආයුර්වේද ඖෂධ වෙළඳසැලක වුවද ආයුර්වේද කොමසාරිස්වරයාගේ නිර්දේශය නොමැතිව මදනමෝදකය විකිණිය නොහැකි බවද පොලීසිය සඳහන් කළේය.
කුරුණෑගල දිසාව බාර නියෝජ්ය පොලිස්පති සුජිත් වෙදමුල්ල ගේ උපදෙස් අනුව මාවතගම පොලිස් ස්ථානාධිපති ප්රධාන පොලිස් පරීක්ෂක හෙට්ටිආරච්චි සිද්ධිය පිළිබඳව පරීක්ෂණ සිදු කරයි.
- පුෂ්පකුමාර ජයරත්න – කුරුණෑගල